Naupang video thehdarhtute lakah MSCPCR-in hma an la

Mizoram State Commission for Protection of Child Rights (MSCPCR) chuan thuchhuah siamin, tun hnaia social media hmanga naupang kum tling lo video mawi lo tak thehdarh a ni chu pawi an tih thu leh video thehdarhtute dan anga hrem an nih ngei theih nan hma an lâk thu an tarlang.

MSCPCR chuan, naupang video theh- darhtute dan anga hrem an nih ngei theih nan a theih ang anga an ngaihven thu sawiin, "Mizoram Police Cyber Crime leh District Child Protection Unit ten rang taka hma la a, dan anga pawi khawihtute hrem an nih theihna tura an hnathawh leh hmalaknate chu lawmawm kan ti hle a ni," an ti.

MSCPCR tarlan danin, Information Technology (IT) Act, 2000 Section 67B leh Protection of Children from Sexual Offences (POCSO) Act, 2012 Section 13 & 14 hmangin hursualna kaihhnawiha naupang telna video leh thlalak thehdarhtute chu lung-ina táng tur leh pawisa chawi tura hrem theih an ni.

Internet leh social media hman danah nu leh pate’n an fate an ngaihvena an fimkhurpui a ṭul tak zet thu tarlangin MSCPCR chuan, "Naupangte pawhin internet hmansual chungchangah danin an chungah thununna a lek thei a ni tih an hriat a ṭul hle," an ti.