Hnu chhuina atan ruang phawrh

August 21, 2023 zana thi Sailomawia (72), BSUP, Lawipua cheng thih dan police-in an chhui zui dawn avangin nimin zing khan Sailomawia ruang phawrh leh a ni.

Vanglaini thu dawn danin, Sailomawia ruang hi phawrh a nih hnuah thlànmualah endik (postmortem) a ni a, enfiah zawhah phûm leh nghal a ni. Postmortem result aṭangin police-te chuan Sailomawia thih thubuai kalpui zel dan turah thutlukna an siam ang.

Tarlan tawh angin, Sailomawia hi a fanu Lalrengpuii nen BSUP, Lawipu-ah an chêng dun a, August 21, 2023 zan dar 11 velah a thi a, rinhlelhna a awm loh avangin a tûk August 22-ah vui a ni.

Sailomawiate tlawh fotu a tupa Benjamina leh Lalrengpuii te tun hnaiah an inhau a, Sailomawia thihna chungchang sawi chhuah a ni a; Sailomawia thihnaah inhnamhnawia ngaih an nih avangin an pahnihin September 4 zan khan police-in an man.

Police-te hmaa an sawi dan chuan, Lalrengpuii hian a pain a hauh fo avangin that mai tura a tih angin Benjamin-a hian Sailomawia chu a muthilh laiin a that a ni.

Police-te chuan report (FIR) an dawn bawhzuiin Sailomawia thihna chu an chhui zui a, magistrate aṭanga phalna an hmuh angin ruang an phawrh leh a ni.