Zûk leh hmuam tih lohna hmunah zirna-in zawng zawng puang dawn

Sorkar laipuia Ministry of Health & Family Welfare chuan May 31, 2024 khian No Tobacco Day pualin zirna-in zawng zawng vaihlo zûk leh hmuam tih lohna hmun (tobacco free educational institution)-ah puang turin state tin a hriattir.

Ministry of Health & Family Welfare thu bawhzui hian nimin khan School Education directorate conference hall-ah Mizoram State Anti-Tobacco Day hman a ni. District hrang hrangah hman a ni bawk.

Mizoram State Anti-Tobacco Day hmanna inkhawm hi National Tobacco Control Prog­ramme state nodal officer Dr H Lianthangpuia'n a kaihruai a, School Education director Lalsangliana'n a hmanpui. Mizo­rama zirna-in hrang hranga zir­tirtute tan 'Training of Teachers in ToFEI (Tobacco Free Educational Institution)' buatsaih a ni.

Kum 2014 aṭang khan kum tin September 11-ah Mizoram State Anti-Tobacco Day hman a ni ṭhin a; thupui neih ṭhin niin, kumina thupui chu 'Towards 100% Tobacco Free Educational Institution' tih a ni.