Sorkarin pung awm loin loan a pe thei, guarantor-ah pawh a ṭang thei - Duhoma

ZPM leader Lalduhoma chuan, sorkarin a duh chuan pung awm loin loan a pe thei a, guarantor-ah pawh a ṭang thei tih a sawi rualin, ZPM-in pung awm lo loan an zawrh ngai loh thu a sawi.

Nimina ZPM pisaa inkhawmah Lalduhoma chuan, "Sorkarin a duh chuan pung awm lo loan a pe thei a, guarantor-ah a ṭang thei bawk. Tunah sorkar laipuiin pung awm lo loan SASCI chu state zawng zawng a pûktir a, thil tih theih loh a nih lohzia kan chiang. State chhungah sem ral mai mai tur sum an intiam a, a lêt leh tur awm lo pawh an sem theih chuan sorkar guarantor-a ṭan leh subsidy-te hi chu tih thei reng a ni," a ti.

Lalduhoma chuan, "ZPM hian pung awm lo loan kan zuar ngai lo, subsidy leh quarantor nei chite erawh kan zuar. Bank-in a pung a hauh kha a ṭhen emaw, a vaiin emaw sorkarin a tumsak thei a, chutiang chuan state tam tak chuan subvention scheme hnuaiah an tumsak ṭhin," a ti a; an policy-ah tihhlawhtlin theih loh leh mipui bum tumna a awm loh thu a sawi.

ZPM Leader chuan, political party pakhatin ZPM chu loan pûk leh thil dangah tih theih loh pui intiama mipui bum tumah an puh tih sawiin, a tih theihzia leh state budget ei hek loa tih dan a awm thu a sawi a, "Mizoram sorkar ngei pawhin pung awm loin Champhai Winery tan te, Hnam Chhantu tan te, plywood factory tante loan a pe tawh a, MNF sorkar hmasa pawhin sawhthing loan a pe a, an ngaidam zui nghe nghe a ni," a ti.

Micro, Small and Midium Enterprise Development Act 2006 hmangin loan lâk theihna tur ruahmanna ṭha tak siam a nih thu sawiin Duhoma chuan, "Kumin April aṭang phei chuan loan lak theih zat cheng nuai 500 thlengin an tipung tawh. He dan hnuaiah hian scheme hrang hrang a awm a, kan ṭangkaipui zual tura ngaih, a tlangpui ringawt pawh dinchhuahna tham tur hlir a ni," a ti a; loan lak theihna scheme hrang hrang a sawi lang.

ZPM Leader chuan, an sorkar chuan mi tumruh leh taima, hlawhtlin tum tak takte an thlang ang a, an ei zui dawn tih sawiin, "Loan la tur thlan hi party base-in kan kalpui dawn lo a, vote zawn nan hman kan tum hek lo. A ṭul ang zelin bank-te nen MoU ziakin kan kalpui dawn," a ti.

ZPM inkhawmah hian Aizawl West-II biala an candidate tur Lalnghinglova Hmar pawhin thu sawiin, "Mizo ṭhalaite hian MNF leh Congress an buaipui lem lo. Tun aṭanga kum nga awm turah he ram hi engtin nge a awm ang, tiin kan ram dinchhuah nan ZPM hi beiseiawm a ni. An beiseina awm chhun ZPM-ah rinna an nghat mek a ni," a ti a; ZPM chuan Mizoram ṭha zawk din an tiam tih a sawi.

Lalnghinglova Hmar chuan, "ZPM kan sorkar a nih chuan nasa takin zirna lama hma kan sawn leh zualna turin kan thawk dawn a. Aw Zoram lo dingchhuak rawh, i tan khua a var dawn ta kan tih theih nan kum 2023 inthlanah hian duhthlanna kan siam dik a ngai a ni," a ti.