KHAWTHLIR

TKP-in thisen pe

ṬKP, Serchhip Pastor Bial chuan nimin khan Serchhip District Hospital tan thisen unit 19 an pe a, petute mipa 10 leh hmeichhia pakua an ni.

Tuivaia tla hmu

September 9, Inrinni chhun dar 11 vela Tuivai luia tla hlum, Lallawmvela (31) s/o Dohneha, NE Tlangnuam ruang chu September 10, Pathianni tlai dar 5 vel khan a tlâkna aṭanga hla vak loah hmuh a ni. Lallawmvela hi nimin chawhma khan vui a ni.

Kawng thar hawng

Minister K Lalrinliana chuan nimin zing khan Bawngkawn Brigade Field tlak lama khawtlang mipui sum thawh khawm hmanga siam kawng thar a hawng. Kawng hi metre 180-a thui, metre 3-a zau a ni a, mi 35 aṭanga sum hmuh Rs 3,06,000 hmanga siam a ni.

Leiminin delh hlum

Nimin chhun dar 12:30 vel khan NHIDCL hnuaia national highway zauh hna thawh mekah Keiṭum khaw chhunga hnathawhnaah kawng ko leminin hna thawktu pakhat a delh hlum a, mi dang pakhat a hliam. Leiminin a delh hlum hi John Reang (19), Tripura a ni a, a delh hliam erawh a ngaihtuahawm lutuk lo nia thu dawn a ni.

Tanpuina hlan

Aizawl District Court Welfare chuan Manipur-a Zo hnahthlakte chhawmdawlna atan nimin khan Central YMA hnenah Rs 45,700 an hlân. Jesus Christ Helping Hands, Hyderabad pawhin Manipur Mizote tan CYMA-ah thawmhnaw leh bungrua/hmanrua eng emaw zat a pe bawk.

Hruaitu atan thlang

September 9-10, 2023 chhung khan Wardha, Maharashtra-ah Indian Political Science Association (IPSA) Conference vawi 60-na neih a ni a, IPSA Executive Committee member atan Prof. Jangkhongam Doungel, Political Science, Mizoram University thlan tlin a ni. Hmarchhak state aṭangin Assam mi pahnih leh Sikkim mi pakhat thlan an ni bawk.