A tahtawla Rs 3,00,000 sem turin ruahmanna siam a ni - Agri. Minister
Agriculture minister C Lalrinsanga chuan, MNF kaihhruai Mizoram sorkar flagship programme Socio-Economic Development Programme (SEDP) hnuaiah vawi khatah Rs 3,00,000 inpek theih a nih loh avangin a tahtawla cheng nuai 3 sem tura ruahman a nih thu a sawi.
C Lalrinsanga hian nimina Lungleia SEDP ṭanpuina thawh hnihna (second phase) dawng turte hnena SEDP chungchang hrilhfiahna a hmanpuinaah thu a sawi a, "SEDP hnuaiah hian vawi khatah cheng nuai 3 inpek theih a ni lo a, a tahtawla cheng nuai 3 hi sem chhuak turin ruahmanna siam a ni," a ti.
Minister chuan, "SEDP thawh khatnaa third instalment te, thawh hnihnaa second instalment-te a tahtawlin sem zel a ni dawn a, line department ṭhenkhata trade ṭhenkhatah chuan cheng nuai 3 kan pek tawhte pawh a awm," a ti a; Covid-19 léng vanga harsatna karah Mizoram sorkarin SEDP tihhlawhtlin nan theitawp a chhuah thu leh SEDP thawh thumna pawh kalpui leh thuai tura ruahman a nih thu a sawi.
C Lalrinsanga chuan, SEDP ṭanpuina sum chu a dawngtute bank account-a dah luh ringawt chuan dawngtute'n an duh duhnaa an hman palh a hlauawm thu sawiin, "A hmanna tur dik taka an hman a, eizawnna ngialnghet leh an khawsak dinhmun tih ṭhatna atan an hman ngei theih nan mumal taka infuihna hun buatsaih a ni," a ti.
SEDP thawh hnihna dawng turte tana inhrilhfiahna hun hi nimin vêk khan Kolasib, Mamit leh Khawzawl district-ahte pawh buatsaih a ni a; Mamitah chuan bialtu MLA H Lalzirliana'n hmanpuiin, Kolasib-ah district bawrhsap John LT Sanga'n a hmanpui. Khawzawlah chuan bawrhsap K Lalrohlua hoin Khawzawl, Chawngtlai, Hmuncheng, Arro leh Tualte khuaah hun hman a ni.
Sorkar thuchhuah tarlan danin, Kolasib district-ah SEDP thawh hnihnaa ṭanpuina dawng tur mi 1,474 an awm a, Mamit district-ah chuan ṭanpuina dawng tur mi 4,602 an awm. September 2023 chhungin first instalment Rs 25,000 pek vek tum a ni.