India/Bharat vanga hlâwk leh hloh phahna a awm em? - BJP President

BJP, Mizoram Pradesh president Vanlalhmuaka chuan nimin khan Aizawla an party pisaah thu sawiin, India tih emaw Bharat emaw avanga hlâwk phahna leh hloh phahna a awm em tih inenfiah a ngaih thu leh, Mizoram tluchhe mek tundinna turin Rs 5,00,000 hmanga bul ṭanpuina tur manifesto an siam thu a sawi.

Vanlalhmuaka chuan, Mizoram mipuiin an buaipui loh tur leh an hlâwkpui miah loh tur an buaipui nia sawiin "Tunlai pawh hian India tih emaw, Bharat tih vel kan buaipui leh mek. India tih vang emaw, Bharat tih vang emaw hian kan hlâwkin kan hloh phah em tih hi kan inenfiah a ngai," a ti.

BJP President chuan, Mizoram tluchhe mek tun dinna tur leh economy chhe lutuk siamṭhat nan Rs 5,00,000 hmanga mipui bul ṭanpui turin manifesto an buatsaih niin a sawi a, "Chu sum hmang chuan mi retheite'n bul kan ṭan thei tawh dawn a, loneitute tan KCC loan kaltlangin a pung awm loa loan pêk theihna a awm bawk. BJP chuan farmer-te hi kan ram dinchhuahna bulpui an nih vangin kan ngai pawimawh a, kan ram economy siam that nan a pawimawh avangin kan hmalakna tur a ni," a ti.

Mizoramah eng lai pawhin kawng a chhe hle nia sawiin Hmuaka chuan, "A mawhphurtu chu sorkar chauh ni loin, sorkarna siamtirtu Mizoram mipui zawng zawng hi kan ni," a ti a; chu harsatna aṭanga chhanchhuak theitu chu BJP niin a sawi.

Vanlalhmuaka chuan, "Mizo Kristiante hian Pathianin a malsawmna min dahsak tawh pawh hi kan ta tur a ni loah kan ngai a, development rawn thleng turte chu Hindu emaw ti tlat rawngbawltu kan nih hlawm avangin Mizoram hian retheihna hi kan ta bik emaw kan ti ta tlat," a ti a; hmasawnna chu ringtute ta a ni tih hre chunga BJP thlang turin mipui a sâwm.