RD Minister-in Ngopa hall a hawng

Rural Development minister Lalruatkima chuan nimin khan Ngopaah community hall thar a hawng a; village organisation pathum hnenah self help group member-te hman tur puanṭhui khawl a sem bawk.

Lalruatkima chuan, hmasawnna dawngsawng turin mipui an inbuatsaih a ṭul thu sawiin, "Tun aṭanga kum nga chhungin he lai tlangdung khuate hi Aizawlah an lehlâng hman dawn," a ti a; RD department hmalaknate chu tehkhàwng hrang hrangah India ram pumah pahnihna a nih thu a sawi.

Pathianin Zofate insuih­khawmna kawng min rel sak dan ropui a tih thu sawiin Lalruatkima chuan, "Kan unaute chak lakna dan beh an ni a, Mizoram lam aṭang loin chak a lak theih loh. Ngopa road-ah motor lian a tlan tam phah hle. Kan unaute damkhawchhuahna a nih phawt chuan kan kawng chu chhe rih ang hmiang, Pathian zarah kan siamṭha leh mai ang, tih hi ka ngaihdan a ni," a ti.

Bialtu MLA L Thangmawia pawhin thu a sawi a, Ngopa YMA leh mipui tan tarpauline, puanṭhui khawl leh parachute a hlan.

Ngopa Community Hall hi Border Area Development Programme sum nuai 109.50 sênga sak a ni a, mi 350 vel lenna tura ruahman a ni.

Minister Lalruatkima hian nimin vek khan Ngopa Hmunnghakah bawlhhlawh sâwngbàwla leiṭha siamna khawl Micro Level Biomass Briquette Production Unit a hawng a, MGNREGS material component cheng nuai 30 sênga siam a ni.