Manipur chungchangah fimkhur turin ngen

Zo Reunification Organisation (ZORO) thuchhuah siamin, Manipur-a Mizote ṭanrualna tichhe thei thil leh thu dik tluantling lo leh zeldin thute hmanga inbeihna lakah fimkhur turin mipui an ngen.

ZORO chuan, Manipur-a Mizote inkar boruak tichhe thei zawnga thu thehdarh a awm palh thei tih sawiin, "Ṭanrualna tichhe thei thil leh thlêmna eng emaw, an kar tichhe thei thu bawplawk leh ilo, tluantling lo leh zêldin thute vawrh darh hmangtea beihna lakah fimkhur turin kan ngen. Ṭanrualna chauh hi an dam khawchhuahna tur a ni a, unau kar thu hi sawi tur a awm a nih chuan râlmuan hunah sawi tur a ni tih vawng tlat turin kan ngen a ni," an ti.

Mahni ram leh hnam veng him a, nunna chán pawh huama râl hmatâwnga duty zawng zawngte an chhuan thu sawiin ZORO chuan, "Zahna chibai kan bûk a ni," a ti a; frontline-a duty-te chu thâ thlah loa hnam dang laka zâm ngai lo turin an chah.

ZORO chuan, an theih ang angin Manipur-a Mizote tan hma an la reng tih tarlangin, "Tuna Meitei relsak leh relpui ni lo, mahnia ro inrela an awm theihna tura an zin kawngah pawh kan tlânchhe ngai dawn lo a, an ṭan chhung chu a theihna apiangah kan ṭang dawn. Kan ṭan rual phawt chuan kan tih theih loh tur a awm bik lo," an ti a; Manipur-a Mizote Mizoram mipuiin an thlâwpna avanga an lawm thu an tarlang.

Manipur-a Mizote'n an beihna chu a la hlawhtling ngei an beisei thu sawiin ZORO chuan, "British-in Zo fa eng emaw zah Meitei behchhanin a awp a, chu chu India-in a chhawm avangin Zo fa eng emaw zat chu Manipur state chhungah rìn luh a ni. Min awp luitute sùlhnu hi ṭhiah a ni ang tih kan beisei," an ti a; Manipur-in territorial integrity hran an nei loh thu an sawi bawk.