District hospital-a doctor post ruak Hnawhkhah a harsa - HFW Minister

Health & Family Welfare minister Dr R Lalthangliana chuan nimin khan Saitualah chief medical officer (CMO) pisa thar a hawng a; tunah chuan district hospital-a doctor post ruak hnawhkhah a harsat rih thu a sawi.

HFW Minister chuan, doctor indaih lohna a nasat thu sawiin, "Tunah hian sorkarin a chhawr lai doctor 30 chuangin post graduate an zir mek a, service laite an lo pension a nih loh pawhin nunna chánte an lo awm ṭhin. ZMC-a final year zo tawhte'n internship an ti mek bawk si nen, district hospital-a doctor post ruak hnawhkhat turin tun dinhmunah chuan a harsa rih hle a ni," a ti.

Dr R Lalthangliana chuan, HFW department chu sorkarin a ngai pawimawh nia sawiin, "Doctor pension hun pawh kum hniha pawhsei a ni a, tun hnaiah Nursing Directorate din turin hriattirna tihchhuah a ni. Nurse-te ram danga an thawh theihna tur a theih ang anga dap a ni a, indawrna a kal mek," a ti. Saitual district chu sorkarin a ngaihsak niin a sawi bawk.

Saitual bawrhsap Dr Lalngura Tlau chuan, Saitual CMO pisa hawn a ni chu lawmawm a tih thu a sawi rualin, a theih anga thawktu dah tura hma la turin Minister a ngen a; AMC mayor Lalrinenga Sailo pawhin Minister hnenah hian Saitual mamawhte a thlen bawk.

Saitual CMO pisa hi Mizoram Health System Strengthening Project hnuaiah cheng nuai 441 sengin Lushai Engineers-in an sa a; chhawng lia sang, square metre 1,071.6-a zau a ni