Ram danga inthawn chungchang CYMA-in Home Minister an sawipui

Central YMA hruaitute chuan nimin khan Home minister Lalchamliana a pisaah an kâwm a, mipat hmeichhiatna hmansual thlalak social media-a darh chungchang leh ram danga hna thawk tura dan loa Mizo ṭhalaite thawn chhuah chungchang sawipuiin, a ṭul anga hma la turin an ngen.

CYMA hruaitute chuan, hun kal tawh leh tun hnaiah agency hrang hrangin Mizo ṭhalaite eizawnna ṭha zawk ngaihtuahsak thei anga inzuarin, mi ṭhahnem tak ram páwnah an thawn thu leh, ram danga hna thawk zinga eng emaw zatin harsatna an tawh thu an hrilh.

Hna thawk tura Mizo ṭhalaite thawn chhuaktu agency hrang hrangte chu chhui chiang a, hrem ngaite hrem an nih theih nan hma la tur leh Mizo hmeichhiate dinhmun hima an awm theih nana hma la turin CYMA hruaitute chuan Home Minister an ngen a ni.

Central YMA hruai­tute chuan, tun hnaiah mipat hmeichhiatna, hmei­chhiat hmeichhiatna leh mipat mipatna hman sualna Mizorama a hluar tial tial a, chu'ng thil ṭha lo leh sualte chu mipui vantlang hmuh theih tura social media hrang hrang - Whatsapp, Instagram, Youtube leh a dangahte hmuh tur a tam thu leh an ngaimawh thu an tarlang.

Hursualna lam thil mipui vantlang hmuha tihchhuah chu mipui zahlohna leh dan palzûtna lian tak a nih thu sawiin CYMA hruaitute chuan, thil sual titute leh dan loa thil tite zawn chhuah an nih a, dan anga hrem an nih theih nan hma la turin Home Minister an ngen bawk.