Air Marshal-in ram venhimna atana Airport siamna tur a rawn ngaihven

Indian Air Force-a Eastern Air Command-a air officer commanding-in-chief (AOC-in-C) Air Marshal SP Dharkar chuan Mizoram a rawn tlawh a, India ram venhimna atana Mizorama airport ṭha chi siam dan tur a ngaihven nia thu dawn a ni.

Air Marshal SP Dharkar leh a thawhpuite chuan nimin khan Governor Dr Hari Babu Kambhampati leh chief minister Zoramthanga te a hran ve vein an kâwm a, Mizorama an rawn kal chhante an hrilhfiah.

CM Zoramthanga chuan, Mizoram chhim lamah airport ṭha tak, civil leh IAF-in an hman ṭangkai theih tur awm se ṭha a tih thu a lo hrilh a ni.

Air Marshal SP Dharkar chuan, Mizorama an kal chhan ber chu, India hmar­chhak venhimna tihchak zelna atana Mizorama airport ṭha heliport nei tel, helicopter eng emaw zat chhawp theihna siamna tur hmunhma ṭha a awm leh awm loh enfiah a nih thu a sawi a; hmunhma ṭha a awm a nih chuan theih­tawp chhuaha tihhlawhtlin ngei an tum tur thu CM a hrilh.

Chief Minister chuan, IAF duh ang airport siamna atana hman theih tur hmunhma hmun pahnihah an hual thu a sawi a; Air Marshal chuan, a rang lama a bawhzui nghal tur thu a sawi a ni.

Air Marshal SP Dharkar leh CM Zoramthanga hian ram venhimna atana Mizorama hmalak ṭulna hrang hrangte an sawi dun bawk.