Kan elpui party dangte hi ka sawisel hman lo - Lalsawta

Congress party chuan nimin khan Keifangah Ṭawi biala campaign hawnna inkhawm an buatsaih a, MPCC president Lalsawta chuan, "Kan elpui party dangte hi ka sawisel hman lo," a ti a; Ṭawi biala Congress party candidate tur chu Lalringliana Khiangte a nih thu a sawi.

Lalsawta chuan, an elpui party dangte a sawisel hman lo nia sawiin, "Congress party chu kan tih tumah kan chiang. Ram hmasawnna rahbi pawimawh tak tak kan ngaihtuah a, kan ram tan, kan hnam leh sakhaw tana kan hmachhawp hi sawi tur ka ngah lutuk a, mi dang ka sawisel ve hman lo a ni," a ti.

Mizoram tana ṭha tur an ngaihtuah rualin, BJP leh an thawhpuite an dodal tel zel dawn tih sawiin Lalsawta chuan, "Party anga dodal ni loin, Kristiante tan an him loh em avangin kan dodal ang. Kan ram hian chhantu a mamawh a, chhan turin kan rawn pên chhuak a ni," a ti a; Mizoram leh India ramah sakhaw zalenna duhtu Congress party an sorkar a ngai niin a sawi.

Lalsawta chuan, India leh Mizoramin hun khirh tak an tâwk mek nia sawiin, "BJP-in Hindu hmangin min rawk mek a, state thenawmah a result kan hmu mek. India ram leh Mizoramah sakhaw zalenna a pilbo tial tial a, Kristian missionary-te dinhmun a derthâwng a, rawngbawl ṭha thei loin an awm. BJP leh a thawhpui party-te hi India ram leh Mizoram tan a him lo a, kan thlang tling leh a nih chuan kan hmabak a êng lo hle a ni," a ti.

MPCC President chuan, ṭang puihna an siam tih sawiin, "He thil hi a thlàwna sem ni loin, ṭang tak takte puihna tur, eizawnna ngêlnghet an neih theihna atan din a ni dawn. Congress party-in kan ti ang kan tih chu kan ti mai ṭhin a, kan ti leh tak tak dawn a ni," a ti a; inthlanah an candidate vote turin Ṭawi bial mipui a sáwm.

Inkhawmah hian Ṭawi biala INC candidate tur Lalringliana Khiangte pawhin thu a sawi a ni.