Smart classroom hnuaiah bungrua hlân

Deputy chief minister Tawnluia chuan nimin khan Mualpuia Aizawl College hmunah Aizawl Smart City Limited hnuaia zirna-in tihchangtlunna tur smart classroom project kaltlangin zirna-in hrang hrang hnenah bungrua a hlan.

Aizawl Smart City hnuaiah hian zirna-in 225-ah smart classroom kalpui a ni a, September 30, 2023-ah chuan hmalakna peih vek tawh tura ruahman a ni.

Tawnluia chuan, Aizawl Smart City hnuaia smart classroom project kalpui chu phûrawm a tih thu sawiin, "Hei hian thiamthil zir leh zirna tihhmasawnnaah zirlaite leh zirtirtute nasa takin a pui thei dawn. Infiamna lamah pawh Smart City kaltlangin hmun parukah phûllem phah mek a ni," a ti a; solid waste management centre din nan sorkarin cheng nuai 5,000 a dah thu a sawi.

Aizawl Smart City Ltd Board of Director chairman Lalmalsawma Pachuau tarlan danin, Aizawl Smart City hnuaia project 43 kalpui zinga 10 chu zawh a ni tawh a, thawh mek 33 a awm. Smart City hnuaiah hna thawhna tur cheng nuai 51,300 hmuh a ni a, sector 13-ah project kalpui a ni. College, khawtlang leh YMA library tihchangtlunna tur New Age Learning Center hmun ṭhenkhatah siam tum a ni.

SMART CLASSROOM PROJECT

• School Education department hnuaia Aizawla sikul 94 tan smart classroom 116 siam.

• Higher & Technical Education department hnuaia zirna-in 14 tan smart classroom 109 siam.

• Zirna-in 108-ah smart classroom 225 siam a ni dawn.

• Interactive board (interactive flat display panel) inchi 75-a hlai, 3KVA power back up keng tel dah a ni dawn.

• Primary school 121-ah computer, printer leh a kaihhnawih dangte pek a ni dawn.

• Smart classroom project atan cheng nuai 743 sên a ni.

• Silicon Infotech Pvt. Ltd chu supplier a ni a, August 16, 2023-ah inremna siam a ni.

• September 30, 2023-ah smart classroom hmalakna peih vek tum a ni.