Eizawnnaa kawlphetha hman dan zirho

SELCO Foundation leh Northeast Initative Development Agency (NEIDA) chuan nimin khan MISTIC Innovation Facility Centre, MINECO-ah 'Awareness meet about decentralised renewable energy driven solutions' an buatsaih a, Aizawl bawrhsap Nazuk Kumar-i'n a hmanpui.

Zirhonaah hian Aizawl district-a khaw 15 aṭangin loneitu, ran vulhtu, ei leh in siamtu, self help group leh micro enterprise neitu mi 50 chuang an tel. Ni tin eizawnna leh khawsaknaa harsatna an tawh te, Mizoram hmun kilkhâwr ber thlenga mipui ni tin khawsakna a awlsam zawk theih nan leh kawlphetha thianghlim, daih rei, leilung mil leh mi tin ban phâk a awm a, ṭangkai taka mipuiin an hman ve theih dan tur zirho a ni.

Nazuk Kumar chuan, ni zung chakna hmang kháwlte hman ṭangkai thiam a ṭul thu sawiin, "Ni tin khawsak eibàr zawnnaah awlsamna min thlentu a ni a, sum leh pai inremchennaah nasa takin min pui thei. In tin hian ni zung chakna hmang thei kháwl chi hrang hrang kawl ṭheuh thei ila, kan khawsak a tiawlsamin, hmasawnna kawnga min pui thei tur ṭangkai tak a ni ang," a ti.

SELCO Foundation hian Bangalore-ah bul ṭanin, Odisha, Jharkhand, Assam, Meghalaya, Manipur leh Mizoramah hma an la mek a; Mizoramah chuan January 2023 khan bul ṭanin, loneih, ranvulh leh sumdawnna huangahte kawlphetha hmanga khawsakna tihhmasawnna turin Aizawl, Kolasib, Serchhip leh Mamit district-ahte hma an la mek a ni.