Kolasib IPRO leh MJA-te an inkâwm

Kolasib-a Information & Public Relations officer (IPRO) thar C Lalhruaitluanga chuan nimin khan a pisaah Mizoram Journalists' Association (MJA), Kolasib district member-te thingpui inpui pahin a kâwm a; social media hman danah mipui zirtir leh kaihhruai chu an mawha la tel turin a chah.

Kolasib IRPO chuan, "Tunlaia social media hman dik loh tam em em hi a veiawm a, social media hman chungchanga mipui zirtir leh kaihhruai hi in mawha la tel turin ka duh che u a ni," a ti a; thuràwn pe ṭhin turin MJA member-te a ngen.

C Lalhruaitluanga chuan, IPR leh MJA ten thawhhona ṭha tak an neih ṭhin chu chhawm nun zel a beisei thu sawiin, "Sorkar hmalakna puanzarah te, mipui hnena zirtirna ṭha thehdarhah leh ram siamṭhatna tura rawtna ṭangkai siamahte thuthar thehdarhtute hi hmanraw pawimawh ber pakhat an ni," a ti.

Kolasib district MJA president Andrew Vanlalauva pawhin thu a sawi a, MJA hmalakna hrang hrang a tarlang.

Inkawmhonaah hian thawhhona turte sawiho a ni a; sorkar department/pisate'n chanchinbu kaltlanga advertisement an tihchhuah chungchangah sorkarin chhuah man (rate) a bituk leh chhuah dan tur a siam anga display leh classified-a chhuah tur chite a dik taka kalpui ṭha an tih thu an sawi. Advertisement tur ang chi advertisement atana pek a nih zel theih nan leh IPR kaltlang loa advertisement pek a awm loh nan a theih ang anga hmalak ni se, an ti.

Kolasib district-ah hian MJA member 14 an awm mek a ni.