IT hmanga thil dahṭhatna hawng

Land Revenue & Settlement minister Lalruatkima chuan nimin khan Champhai DC conference hall-ah huan, lo leh ram kaihhnawih lehkha pawimawhte information technology (IT) hmanga dahṭhatna leh chhinchhiahna tur, Computerization of Registration, National Generic Documentation System a hawng.

Lalruatkima chuan, LRS department chu mipui dawrtu nei ngah berte zinga mi, hna hautak em em a nih thu a sawi a, "LRS department hnuaia thawktu indaih lohna, a bik takin surveyor indaih lohna avangin mipuiin harsatna an tawh ṭhin chu department-in a hriatpui a, surveyor 15 lak belh turin MSSSB nen hmalak mek a ni," a ti.

Mizorama thingtlang khua 319-ah property card pe chhuak turin LRS department a inpuahchah mek tih sawiin, chuta tan chuan van sang aṭanga zirchianna (aerial survey) neih a nih tawh thu a sawi.

Hawnna inkhawm hi LRS secretary R Zarzosanga’n a kaihruai a; khualzahawm Dr ZR Thiamsanga, Champhai North bialtu MLA, Champhai DC James Lalrinchhana leh mi pawimawh dangte pawhin thu an sawi. Online document registration ti duhte tan igrmizoram.nic.in ah tih theih a nih thu tarlan a ni.