Mizoramah 2011-2021 chhungin tuia tla hlum 300 chuang an awm

Disaster Management & Rehabilitation (DMR) department chuan nimin khan Taxation audi­torium-ah tuia tla hlum an tlem zawkna tur leh luiah mipui an him zawk theih dan tur chungchang zirhona an buatsaih a; kum 2011-2021 chhungin Mizoramah tuitla vanga thi mi 300 chuang an awm tih tarlan a ni.

Zirhonaa tarlan danin, kum 2011-2021 chhungin Mizoramah tuitla vanga thi mi 300 chuang awm anga chhinchhiah a ni a, chu'ng zingah chuan kum 21-40 inkar an tam ber.

World Health Organisation chuan kum tin tuitla vangin khawvelah mi 3,60,000 an thi ṭhin angin a chhinchhiah a, a zatve chu kum 30 hnuai lam an ni. Kum 2021 khan India ramah tuia tla hlum mi 36,362 an awm.

Sorkar laipuiin tuia tlâk hlum chu khuarel chhiatna (disaster)-ah a telh loh avangin tuia tla hlum chhungte hnenah zangnadawmna (ex-gratia) pek theih a ni lo.

Zirhonaa khuallian Lalchamliana, DMR minister chuan, tuitla an awma Mizo dana ni sarih chhung zawnga che chhuak ṭhinte chhuanawm a tih thu a sawi a, "Vanduai hrim hrim vanga tuitla an awm rualin, ṭhenkhat chu fimkhur tâwk loh vang a ni ṭhin. Rûi chunga tuia chèn te, basangam ringawtte leh a bik takin fûr laia lui tui hlauhawm theihzia hriat loh vangte a nih avangin fimkhur thar a ṭul," a ti.

Tuitla an awmin an tlâkna bula khaw mi leh sa an hah ṭhin thu sawiin Minister chuan, "Ruang zawnga theihtawp chhuah a ngaih tawh loh a, tuitla zawn tur kan awm tawh loh nan theihtawp kan chhuah tlân a pawimawh," a ti a; thawhhona ṭha neih a pawimawh thu a sawi.

Zirhona hi quick response team, Aapda Mitra, YMA leh Mizoram University hnuaia Centre for Disaster Management mite tana buatsaih a ni a; DMR deputy director Dr Lalrokima Chenkual-in Mizorama tuitla thlen tawh dan (Prevalence of River Accidental Drowning in Mizoram) a sawifiah.

Tuitla chhan-chhuahnaa tawnhriat nei ṭha - Central YMA, Sairang, Sairang Dinthar leh Sihhmuia YMA branch aiawhte'n thu an sawi a; sawihona hun hman a ni.