Champhaiah SARAS Fair buatsaih ṭan

Nimin khan Champhaia Vanlallawma Indoor Stadium-ah self help group (SHG)-te thil siam leh tharte pho chhuahna leh hralhna hunpui, Sale of Articles of Rural Artisans Society (SARAS) Fair vawi 8-na buatsaih a ni a, Rural Development minister Lalruatkima'n a hawng.

SARAS Fair 2023-ah hian RD block 19 aṭangin SHG-te'n stall 50 leh food court pathum an siam a; a hawnna inkhawmah hian SHG 44 hnenah bank hrang hrangin loan cheng nuai 220 an pe chhuak a ni.

RD Minister chuan, SARAS Fair chu SHG-te dinhmun chawi kân leh an hmalakna tihhlawhtlin zelna tur pawimawh a nih thu a sawi a, "RD department hmalaknain livelihood scheme hrang hrang kalpui ṭhin a nih bakah, Deen Dayal Upadhyaya Gram Jyoti Yojana kaltlangin ṭhalaite tan training buatsaih ṭhin a ni a, DDUGJY hnuaiah hian mi 1,069-in training an zo tawh a, mi 957 chuan hna ṭha tak an hmu," a ti.

Mizoramah SHG 10,708 a awm mek tih sawiin Lalruatkima chuan, "SHG-te hnuaiah hian member mi 84,169 an awm a, kan economy ṭhan zelna leh ram intodelhna turah hmun pawimawh tak an luah a ni," a ti a; Mizorama SHG hmalakna a hlawhtlin chhan chu bank-te'n an ṭawiawm ṭhat vang a nih thu a sawi.

Khualzahawm TJ Lalnuntluanga, minister of state pawhin thu sawiin, "Ram dang leh state danga innghat loa kan economy kan tihlen a, intodelhna kawngah ṭan kan lak zel a ṭul. Kan state siam leh thar chhuahte kan ngaihhlut thiam a, kan phâk tâwk ang ṭheuhin SHG-te pawh kan puih ve ṭhin a ṭul a ni," a ti.

SARAS Fair hi Mizoramah kum 2015 khan buatsaih ṭan niin, kumin hi vawi riatna a ni a; September 16, 2023 thleng zing dar 9 aṭanga tlai dar 5 inkarah hawn a ni ang.