Mizoram KVIB pisa thar hawng

Commerce & Industries minister Dr R Lalthangliana chuan nimin khan MINECO-ah Mizoram Khadi & Village Industries Board (KVIB) pisa thar a hawng. Pisa hi Special Assistance to States for Capital Investment (SASCI) aṭanga hmuh cheng nuai 500 sênga sak a ni.

Pisa hawnna inkhawm hi Mizoram KVIB chairman Lalthanliana'n a kaihruai a; Minister chuan, "Mizo kutchhuak thil chi hrang hrangte a zahpuiawm ta lo hle a, sorkar hna chauh ni loin, mahni themthiamna leh talent hmangin eizawnna tling thil tam tak a awm tawh a ni," a ti.

Mizoram KVIB hi Mizoram Legislative Assembly-in statutory board ni turin kum 1986-ah a din a; a ngheta thawk mi 119 leh a nghet loa thawk mi 15 an awm mek a ni.