KHAWTHLIR

Trash to treasure

Mizoram Pollution Control Board hnuaia Mizoram EIACP Hub leh Women's Polytechnic, Aizawl chuan Mission LiFE programme hnuaiah nimin khan Durtlanga Jeriko Khualbûkah 'Workshop on trash to treasure' an buatsaih. Jeriko Khualbuka awmte chu hman khat daih sarâng hman tawh aṭanga hmanraw ṭangkai dang, sumdawnna leh eizawnna atana hman theih tur siam chhuah dan an zirtir a ni.

Award dawng

Mizoram University-a Centre for Distance and Online Education director Prof. Zaithanzauva Pachuau chuan tun hnai khan Exemplary Contribution Award - Academia a dawng. Award hi September 8, 2023 khan Mumbai-ah sem a ni a, Prof. Zaithanzauva Pachuau hian online education hmanga hnathawh tur nei thei zirlai tam tak MZU aṭanga a chher chhuah avangin a dawng a ni.

Chawmdàwlna hlan

North Eastern Electric Power Corporation Ltd, Tuirial Hydro Electric Project chuan nimin khan an corporate social responsibility kaltlangin Manipur aṭanga sahimna zawnga Kolasib district-a lutte ṭanpui nan Kolasib bawrhsap John LT Sanga hnenah Rs 1,00,000 an hlan. Kolasib district-ah hian camp 13-ah raltlan chhungkaw 207-a mi 983 an awm mek a; mahni chhungte bêl leh in luaha khawsa chhungkaw 775-a mi 2,677 an awm bawk.

Bungrua vailiam

MSU General Headquarters chuan Mizoram Second Container (Medical equipment & supplies, manna pack) USA aṭanga an chah luh chu bungruate chu Mizorama ráltlân awmna hmun hrang hranga sem turin nimin khan Vanapa Hall kawt aṭangin an vailiam. Bungruate hi Chin National Organisation hnenah hlan a ni a, relief camp hrang hranga sem turin vailiam a ni.

Mitthi pasal man

Laldinpuii (30) d/o Lalsangliana, Serchhip Leisang Veng, September 10, 2023-a a thih chungchangah a pasal Vanlalnghaka chu thu zawhfiah atan police-in an man. Thu dawn danin, Laldinpuii te nupa hi June 2023 aṭangin Zotlang, Aizawlah an khawsa a, September 10 khan thiin, inâwk hlum angin a pasalin a sawi a ni. Mahse, a mit a duk nasat bakah a taksa dang awm dan avangin inâwk hlum niin an ring lo a, a chhungte'n FIR an thehluh hnuah a pasal chu police-in an la a ni.