Hriselna lama hmasawnna tur Ayushman Bhava hawn a ni

President Droupadi Murmu chuan hriselna lama hmasawnna tur atana duan Ayushman Bhava Campaign chu nimin khan a hawng. Hawnna hun hi Mizoramah pawh Assembly Annexe conference hall-ah video conferencing kaltlangin chhim a ni a, Governor Dr Hari Babu Kambhampati, Health minister Dr R Lalthangliana leh sorkar hotu dangte an tel.

Ayushman Bhava Campaign hawnnaah hian Governor-in Mizoram bik tana hmalakna tur a hawng. Campaign-ah hian chawlhkar li chhunga hmalakna tur ruahman a ni a; campaign hun kar li chhung leh March 2024 thlengin Mizorama khua zawng zawng tuam turin hmalakna eng emaw zat ruahman a ni.

Dr Hari Babu Kam-bhampati chuan campaign thil tumte sawiin, "Ayush­man Bhava hmang hian nasa takin beihpui thlak a ni dawn. Khaw tinah leh mi tin ban phâkin health­care service hrang hrang pek leh mamawh zawng zawng tih­hlawhtlin vek tum a ni," a ti.

Zunthlum, thisen sang, cancer, lung natna, chuap natnate chu mi tam takin an thihpui tih sawiin Larsap chuan, "Hengah hian uar zawka inzirtirna kalpui a ngai," a ti. Ayushman Bhava hnuaia healthcare scheme leh service hrang hrang te, social security scheme dang tam takte a mamawhtute'n an dawn theih nana thawk turin Health department leh department danga thawktute a chah bakah, sorkar thawhpui turin kohhran, tlawmngai pawl leh mi tin a sáwm a ni.

Dr R Lalthangliana pawhin thu sawiin, "Campaign hi a hautak dawn a, mimal, pawl, kohhran leh khaw­tlang anga thawh­puina ṭha a awm phawt chuan a hlawh­tling ngei dawn. Campaign thil tum tihlawhtling turin Health depart­ment sum leh pai leh thawk­tute hi a tâwk lo mai thei a, kan zavaia thawhhona a pawimawh," a ti. Mizorama thingtlang khua zawng zawng chu March 2024-ah chuan khaw hrisel (healthy village)-ah puan tum a nih thu a sawi bawk.

Mizoram tana hawnna inkhawm hi HFW secretary Esther Lal Ruatkimi'n a kaihruai a; Mizorama Pradhan Mantri TB Mukt Bharat Abhiyaan hnuaia mimal, pawl leh district anga hnathawk ṭha zualte hnenah Governor-in chawimawina a hlan. Campaign hi district hrang hrangah hawn a ni bawk.

PM TB Mukt Bharat Abhiyan

* Donor inziak lut tamna ber - Aizawl district (donor 95)
* Ṭanpuina atana damlo pawmpuina lak tamna ber - Serchhip district (100%)
* TB damlo pawmpuina la aṭanga damlo ṭanpui tamna ber - Mamit district (100%)
* Corporate/organisation anga damlo ṭanpui tam ber - Mizoram Rural Bank (damlo 102)
* TB damlo ṭanpui tam ber mimal - Dr Laxmi Narayan Rathore, MZU (damlo 50)