Kut hnathawktute chàwi kân hi kan hna hmasa tur - K Sapdanga

ZPM working president K Sapdanga chuan, kut hnathawktute chàwi kân chu an hna hmasa tur a nih thu leh ṭhalaite chàwi kân pawh an ngaih pawimawh thu a sawi.

K Sapdanga hian nimin khan Hrangtur­zo biala Keiṭum, Khawlailung leh Chekâwn khuate tlawhin thu a sawi a, "Kut hnathawktute chàwi kân hi kan hna hmasa tur a ni a, ṭhalaite chàwi kân pawh kan ngai pawimawh hle. Kut hnathawktute chàwi kân hi kalphung thar a ni nghal mai a, thlai thar lei hian kut hnathawktute chauh a chawi kâng dawn lo a, bazara thil zuar, taxi leh dawrkaite'n a zar kan zo vek dawn a ni," a ti.

Mizoram inthlan chu kut hnathawktute chauhin an nghakhlel lo tih sawiin Sapdanga chuan, "Sorkar hna­thawkte hian sorkar thar hmel hmuh an châk thu an sawi chàmchí tawh a, an sawi hreh tawh lo. A hun taka hlawh pe thei tur sorkar hmel hmuh an châk a ni,” a ti a; Mizo ṭhalai zinga eng emaw zat ruihhloa buaite chhan­chhuah an ngaih pawimawh thu a sawi.

K Sapdanga chuan, Mizoram chhanchhuak turin an chief minister candidate-in hma a hruai tih sawiin, "Eiru lo turin kan intiam. Campaign-naah pawh sum leh pai kan hmachhuan lo a, a neih pawh kan nei ve lo. Mipui hnenah khaw­ngaihna kan dil a ni," a ti a; ZPM candidate vote turin mipui a ngen. Inthlan hun a hnai tawh viau chungin rorel lai party-in candidate la puan theih loh an la neih nual thu a sawi bawk.

ZPM Working President hi Hrangturzo biala ZPM candidate tur Lalmuanpuia Punte-in a ṭawiawm a ni.