Journalist thite sorkarin a ràlna hlan

Mizoram Journalists' Association (MJA) member thi mi pathum Mizoram sorkarin a ràlna (ex-gratia) chu nimin khan IPR minister Lalruatkima'n a hlân.

MJA member-te râlna hun hi IPR Auditorium-ah buatsaih a ni a, IPR director C Lalnunkima'n a kaihruai. MJA president C Lalrambuatsaiha'n ràl turte chanchin a sawi a, anmahni sûn nan minute khat chhung ngawi rengin an ding.

Accredited journalist pahnih - Alfred Vanchhawng, stringer, DDK Aizawl, December 2, 2022-a thi leh LPS vision news reporter V Zoramthara, December 27, 2022-a thi chhungte hnenah ex-gratia Rs 1,50,000 ve ve hlan a ni a; MJA member E Lalhleia, editor, Aizawl Observer chhungte hnenah Rs 1,00,000 hlan a ni.

IPR minister Lalruatkima chuan, chanchinbumi chatuan ram pan tate chu a ui thu leh an kalsan an chhungte a tawrhpui thu a sawi a, sûlhnu pawimawh tam tak hnut­chhiahtute an nih thu sawiin, "An sûlhnu chhinchhiah tlak tak takte kha hriatreng a ni tawh dawn a ni," a ti.

Lalruatkima chuan, MJA member-te chu sorkar aṭangin hlawh la lo mah se, sorkar mi ang an nih thu sawiin, "Sorkar ta kan ni a, sorkar pawh kan ta a ni," a ti a; sorkar aiawha media lam enkawltu IPR department leh chanchinbumite'n thawhhona ṭha an neih zel a pawimawh avangin ṭan la zel turin a chah.

Tunlaiin thu thehdarh a tam a, thu dik lo thehdarh pawh a tam thu sawiin Lalruatkima chuan, "Journalist-te'n mawhphurhna kan nei lian hle. Thil a thleng a, journalist ethic hre ve lote'n an duh ang angin thlalakte nen an thehdarh a, chungte chuan mi rilru natna a thlen thei a, law court thlenga kal theihna a ni," a ti a; thu thehdarh chungchangah mipuiin tih àwm leh àwm lohte an hriat theih nan mipui zirtir kawngah ṭan an lâk a ngaih thu a sawi.

IPR Minister chuan, print media chu khawvelah a pawimawh reng dawn tih sawiin, "Mizoramah pawh a pawimawh reng. Mizo mipuite hi lehkhabu, chanchinbu chhiar tam tura kan inzirtira kan kaihhruai a ngai a, ṭan kan lak a pawimawh," a ti.

Mizoram sorkarin journalist-te tan hamṭhatna eng emaw zat a siam tih sawiin Minister chuan, Mizoram Journalist Welfare Scheme hnuaiah kum khatah Rs 20,00,000 dah a ni a, medical bill atan leh ex-gratia atan hman ṭhin a nih thu a sawi a; Journalist Pension Scheme chungchanga hmalak mek dante a sawi bawk.

Mizoram sorkarin accredited journalist thite Rs 1,50,000 leh accredited journalist ni lo thite Rs 1,00,000-in a rál ṭhin a; nimina ràlna hlan inkhawmah hian IPR department-a thawk te, MJA member-te leh mitthi chhungte an tel a ni.