YMA CCC-in armed police din belh an duh

YMA rorelna sang ber dawttu, Central Co­ordination Committee (CCC) meeting chu nimin khan niléngin Central YMA Hall-ah neih a ni a, vawi 97-na a ni. YMA Inkhawmpui Lian agenda atan Mizoram sorkarin armed police battalion pakhat tal a din belh theih nan hmalak rawtna an pawm.

YMA CCC meeting hi Central YMA president R Lalngheta'n a kaihruai a; October 24-26, 2023 chhunga Biatea YMA Inkhawmpui Liana rèl tur (agenda)-a rawtna lutte thlit fîm a ni a, Inkhawm­pui Liana rèl turin YMA khawih paruk leh sorkar kaih­hnawih pahnih bakah, chhiatni ṭhatni kaihhruaina ennawn leh budget-te an pawm.

CCC chuan YMA Inkhawmpui Liana rêl tur sorkar kaihhnawih an pawm zinga pakhat chu, Mizoram sorkarin armed police battalion pakhat tal a din belh theih nan hmalak rawtna a ni a; quality education (zirna ṭha) a awm theih nan sorkarin tun aia chak zawka hma a lakna tur rawtna an pawm.

Kumpuan atana bûk turin 'Ram leh hnam humhalh' tih leh 'Ruihhlo do' tih an pawm bawk.

CCC meeting-ah hian CYMA hruaitu te, sub-headquarters aiawh mi paruk, group aiawh mi pahnih leh khawpui chhung branch aiawh mi pakhat zel an tel thei a ni.

YMA KHAWIH REL TURA PAWMTE

1. Environment humhalh kawngah hian CYMA-in tun aia chak zawkin hma la
rawh se.

2. Hmun hrang hranga awm Zo fate kan inpumkhat lehzual theih nan tun aia chak zawkin CYMA-in hma la rawh se.

3. Social audit hi ṭha zawka kalpui a nih theih nan leh mipuiin kan hlâwkpui theih nan hmalak ni rawh se.

4. YMA-te'n sorkar department kan thawhhopuite hi zir chian a, thawhpui àwm chauh thawhpui tawh ni se.

5. Environment clearance tel lo chuan Mizoram chhungah hmasawnna hna thawh a nih tawh loh nan CYMA-in hma la rawh se.

6. Tuihna humhalh kawngah YMA-in uar zawk leh nasa zawka hmalak ni rawh se.