KHAWTHLIR

CMRF thawh

All Mizoram Muster-Roll Teacher's Association hruaitute chuan ráltlân zirlaite chhawmdawlna atan Chief Minister's Relief Fund-ah Rs 15,000 an thawh.

Meth leh heroin

Assam Rifles sipaite chuan September 12, Thawhlehni khan Zokhawthar leh Mélbûk inkarah methamphetamine mûm 2,00,000; Rs 60,00,00,000 hù leh heroin kg. 3.978, Rs 27,84,00,000 hù an man. Meth leh heroin an man zawng zawng chu Rs 87,84,60,000 hù a tling.

Gas man bithliah thar

Indian Oil Corporation Limited-in eirawngbawlna gas (LPG) man thar a tihchhuah avangin Food, Civil Supplies & Consumer Affairs department chuan September 4, 2023-a hman ṭan turin nimin khan gas man a bithliah thar a; domestic cylinder (kg. 14.2) man (Rs 1,055) tihdanglam a ni lo a, commercial cylinder leh a dangte man tihdanglam a ni.

FCSCA department tarlan danin, Vairengte tih loh hmun dang zawngah commercial cylinder (kg. 19) chu Rs 1,978.55 man a ni dawn a, XtraTej (kg. 19) man chu Rs 2,007 leh composite (kg. 10) man Rs 758.50 a ni. Vairengteah chuan tláwm hretin, commercial cylinder man Rs 1,966, XtraTeJ man Rs 1,988.50 leh composite man Rs 749 a ni.

Kut hnathawktute thil pawimawh zirtir

Krishi Vigyan Kendra leh Indian Council of Agricultural Research - National Bureau of Plant Genetic Resources (ICAR-NBPGR), Shillong chuan nimin khan Khawzawl KVK hall-ah kut hnathawktu mi 100 tan training an buatsaih a, thupui chu 'Plant genetic resources on Agri-Horticulture crop' tih a ni. Khaw 11 aṭangin kut hnathawktute an tel a; NEH fund aṭangin leiṭha siamna, farm bag leh vaimim nuainate sem a ni.

DC hoin thukhawm

Aizawl District Water & Sanitation Mission chu nimin khan district bawrhsap Nazuk Kumar hoin DC conference hall-ah ṭhukhawm a; Aizawl district-a Jal Jeevan Mission hnuaia Functional Household Tap Connection hmalakna leh Swachh Bharat Mission (Gramin) hnuaia ODF Plus Model tihpuitlin chungchang sawiho a ni.

HMV tlân khap

Saitual leh Hliappui inkar kawng, NH-102B package III-ah nimin aṭanga October 13, 2023 thleng lirthei lian (HMV) tlân khap a nih thu, Saitual District Magistrate-in thupek chhuahin a puang. Thupek zâwm lote chu Disaster Management Act, 2005 Section 51 hmangin hrem theih an ni.