HIV/AIDS donaa Nagaland hmalak dan Mizorama kohhran aiawhte'n an zir

Mizorama kohhran hrang hrang aiawhte chuan nimin khan HIV/AIDS chungchanga Nagaland sorkar leh kohhrante hmalak dan Nagaland khawpui Kohima-ah an zir.

Programme hi United Nations Programme on HIV/AIDS (UNAIDS), Mizoram State AIDS Control Society leh Young Women Chriatian Association (YWCA) hmalakna a ni a; nimin khan Nagaland Baptist Church Council (NBCC) leh Nagaland SACS bultumin Hotel Ura-ah HIV/AIDS chungchanga Nagaland sorkar leh kohhrante hmalak dan te, Nagaland kohhrante'n HIV/AIDS chungchanga training module an buatsaih dan leh inkaihhruainate zir chian a ni.

Presbyterian Kohhran aiawhin Dr Lalchhanhima Ralte, BCM aiawhin Lalhmunsiama Pautu, UPC-NEI aiawhin Rev. Jh Zahluna, Salvation Army aiawhin George Zonunsanga, Roman Catholic aiawhin Francis Lalhmingsanga leh Seventh Day Adventist aiawhin pastor R Lalramnghaka te an kal a; YWCA consultant Zorammawii Ralte leh MSACS assistant director (Prevention) Dr Lalruatsangi ten an hruai.

MSACS leh YWCA hmalaknain Mizorama kohhran tinin an hman ṭangkai theih tur training module buatsaih mek a ni.