Covid-19 in intodelh duhna a tuh - Agriculture Minister

Agriculture minister C Lalrinsanga chuan, Covid-19 hripui léngin Mizote thinlungah intodelh duhna leh pawimawhna a tuha a hriat thu a sawi a, "Kut hnathawktute ngaihhlutna a lian chho ta. Danglamna thleng hi a lawmawm tak zet," a ti.

Agriculture Minister hian nimin khan Melriatah Roadside Market leh Organic Vegetable Market Chain a hawng a, thu sawiin, "Tuna hri lêngah hian kan ngaihtuahna tihdanglamin a awmin ka hria. Tun hma chuan intodelh duhna leh pawimawhna sawi ṭhin mah ila, thin­lungah a awm tak tak lo. Sawi ringawt a ni. Tunah chuan a theihna hmun apiangah miin eng emaw tal thar chhuah an tum tawh," a ti a; hmunhma nei lote pawhin polypot hmangte'n thlai an chîn thu a sawi.

Mission organic project rei tak kalpui tawh a nih thu sawiin C Lalrinsanga chuan, "Organic movement chak taka kalpui hi thil ṭul tak leh tihmâkmawh a ni. Chief Minister hian organic movement a ngai pawimawh a, chu chuan mipui hriselna a ngai pawimawh tih a tichiang.  Khawvelin a ngaih pawimawh chu chemical tel loa thlai chîn a ni. Chemical fertilizer nena thlai chin ei nasat hian hriselna a tichhia niin a lang," a ti.

MPC party president Lalhmangaiha Sailo chuan, Covid-19 hripui lêng lung­rual taka do tlân chu political party tin mawh­phurhna a nih thu a tarlang.

Lalhmangaiha Sailo hian nimin khan thuchah a tichhuak a; Covid-19 leng dona kawnga Mizoram sorkar hmalakna duhkhawp lohna leh demna a awm fo a, MPC party ngei pawhin sorkar an nawrna thu an sawi chhuak fo tih sawiin, "Ṭhahnemngai taka kan induhthawh mek lai hian, mipui ngaihtuahna tibuai thei tura thu dik leh dik lo pawh hriat tur mumal awm loa party inbeihna nasa tak awm ṭhin hi a pawi. Vai rama politician-te chìn dan ṭha lo tak kan entawn ve zel hi Kristian rama tihah chuan a mawi lo a ni," a ti.

MPC President chuan, India ram hmun hrang hranga Mizo tangkhang, hruai haw tawhte leh hruai haw la hmabakte chu uluk taka enkawl a, an mamawhte theihtawp chhuaha phuhru turin Mizoram sorkar a ngen a, "Mipui pawhin kan unau khung hrante lakah kan fimkhur a ṭul hle a, thinhrikna rilru i pu lo ang u," a ti.