Pune-a lirtheia chetsualnaah thi

Nimin zing dar 8 vel khan N Vanlalpeka (25) s/o N Rualhnema, M Kawnpui, Lawngtlai district chu Pune-ah bike-a chetsualnaah a thi.

Pune Mizo Welfare Association (PMWA) hruaitute hnen aṭanga thu dawn danin, N Vanlalpeka hi a ṭhianpa Edward C Lalawmpuia (25), Lawngtlai nen nimin zing khan bike-in an chhuak a, truck nen intipalhin, N Vanlalpeka hi chetsualna hmunah a thi.

Edward-a pawhin hliam a tuar a, a tìrah nikhaw hre loin a awm a, damdawi-in panpui nghal niin, nikhua a hre tawh. Hetihlai hian a thin a thler avangin a ṭawng zawngin a thaw a la hah ṭhin a, doctor-ten treatment an ti mek.

N Vanlalpeka leh Edward-a hi lehkha zira Pune-a awm ve ve an ni a; N Vanlalpeka hian M.Com zo tawhin Pune-ah hian B.Ed a zir zawm a ni.

PMWA hruaitute chuan buaipui ngai ang angte an buaipui nghal a, nizan khan N Vanlalpeka ruang hi vawiina Mizorama rawn thawn turin airport an panpui a ni.