Lengteng MLA-in NHIDCL hotu a kâwm

Lengteng bialtu MLA Dr L Thangmawia chuan nimin khan a bial chhunga NH-102B kawngpui siam kaihhnawihah National Highways & Infrastructure Development Corporation Ltd (NHIDCL) executive director V Jakhara chu a pisaah a kâwm a, kawngpui siam dan tur a sawipui.

Dr L Thangmawia chuan, a bial chhung kaltlanga Manipur pawhtu kawngpui NH-102B chu Manipur-a Mizote châk lâkna pui bera a nih mek thu a sawi a, "Hei vang hian lirthei tlan a tam a, kawng a chhe chak hle a, ngawrh zawka vil a ṭul," a ti a, fûr zawh veleh ṭha zawka kawngpui siam turin a ngen.

L Thangmawia chuan, Puilo-Tuichang (Pu Aichhinga Road)-in national highway a pawhna tun thlenga siam a la ni lo chu a hriatthiam loh thu a sawi a; Ngopa khuain March 2024-a KṬP General Conference a thlenna turah pandal sakna hmanrua phurh dan turte a sawipui bawk.

NHIDCL hotu V Jakhara chuan, ruahtui a tlak nasat avang leh lirthei tlân a tam avangin NH-102B kawng chhia chu an duh anga chaka an thawm ṭhat theih rih loh thu a sawi a; amah ngeiin kar lehah a hmunah a en tur thu a sawi.

Pu Aichhinga Road chungchangah Jakhara chuan contractor-te phone-in a be nghal a; a rang thei anga Puilo VC President hriatpuinaa siam turin a hrilh nghal niin sorkar thuchhuahin a tarlang.

Dr L Thangmawia hi KṬP General Conference 2024 Organising Committee aiawhin K Lianhmingthanga'n a ṭawiawm a ni.