Kum 2011 aṭanga July 2023 inkarah Mizoramah mahni intihlum 1,145 an awm

Mizoram Police chhinchhiah danin, Mizoramah kum 2011 aṭanga kumin July thla thlengin mahni intihlum mi 1,145 an awm a, kumin 2023 bikah mi 60 an intihlum tawh.

National Mental Health Programme bultuma September 11, Thawhṭannia Taxation auditorium, Aizawla mahni intihhlumna vênna ní, World Suicide Prevention Day hmannaa Lalbiaksiami, additional SP tarlan danin, kum 2011 aṭanga kumin July thla (kum 12 chuang) chhungin Mizoramah mahni intihlum mi 1,145 an awm a, chu'ngte chu mipa 954 (82.97%) leh hmeichhia 191 (17.03%) an ni.

Health department tarlan danin, kum 2011 aṭanga July 2023 thlenga mahni intihlum police-in an chhinchhiah zingah kum 20-39 inkar an tam ber. Hetih lai hian, kumin 2023 bikah July thla thlengin mahni intihlum mi 60 an awm tawh a ni.

World Suicide Prevention Day hmannaa khuallian Health principal director Dr Vanlalsawma chuan, mahni intihhlum duhna chu rilru lam harsatna vang a nih thu leh kum bithliah a awm loh thu a sawi a, "A awmna chhan hi a tlangpuiin kan thil tih tawh leh tih mekin min vuak lêt vang te, chumi sawhkhâwkin a thlen harsatnate pal chhuak zo dawn loa inngaihna vangte a ni duh hle. Hetianga harsatna neite hian an harsatna hriatthiampuitu an mamawh a, an lakah dawhtheihna kan neih a ngai ṭhin," a ti.

Health dept. thuchhuah chuan, mahni intihhlum duh mi beidawngte dawngsawng a, an harsatna leh buaina ngaihthlaksak turin TeleMANAS helpline a awm thu leh, helpline number 14416 leh 18008914416-ah engtik lai pawha biak theih a nih thu an tarlang.