Mizoram hi ropui takin a la ding chhuak dawn - CM Zorama

Nimin khan Youth 20 Mizoram (Meet on Nationalism, Patriotism & Development) khârna inkhawm Pachhunga University College multipurpose auditorium-ah buatsaih a ni a; khuallian chief minister Zoramthanga chuan, Mizoram chu ropui taka a la dinchhuah tur thu a sawi.

Chief Minister chuan, tun hnaia harsatna hrang hrang Mizoramin a tawhte sawiin, "Harsatnate hian min chîm buai mah se, Pathian kaihhruainain ropui takin Mizoram hi a la dingchhuak dawn. Hun hnuhnunga chanchinṭha hriltu atan he hnam hi min buatsaih mek. Hnam thinlung nghet tak pu chungin kan ram tan hian i thawk zel ang u," a ti.

Mizo pi leh pute'n thlang tla zelin Pathian ruatsak ram an thleng tih sawiin Zoramthanga chuan, "Kristianna a rawn luh hmain an zinga mi ṭhenkhatin Tuipui ral aṭanga mingo lo kal tur thute an lo puang lâwk a, an sawi ang ngeiin missionary-te an lo kal," a ti a, Mizoram chu Kristian ram a nih tâk thu a sawi.

Zoramthanga chuan, British awpna hnuaiah political party din theih a ni lo tih sawiin, "India a indan dawn hnaih khan din phal a ni ta a, kan hruaitu hmasate khan khawi ram ber hi nge zawm tur ni ang tiin an buai hle. Thutlukna mumal awm hmain British khan min kalsan a, India rorelna a rawn lut ta a ni," a ti.

Chief Minister chuan, a tir ata tun thlengin Mizo nationalism an kalpui reng nia sawiin, "Thâ kan thlah ngai lo. Nationalism hi hnam dangte va huat te, va ngaih theih lohte lam a ni lo. Pathianin min pek ram leh hnam humhalha din chhuahpui hi a ni. He ram leh hnam humhim zel hi mi tin mawh a nih rualin, ṭhalaite'n mawhphurhna pawimawh em em kan nei tih hi i hre reng ang u," a ti.

Khualzahawm, Sports & Youth Services minister Robert Romawia Royte chuan G-20 chungchang leh chumi hnuaia Youth-20 movement neih dan a sawi a, "Mizo ṭhalaite mamawh tak ṭhalaite ngaihtuahnaa nationalism leh patriotism tuh ngheta hmasawnna pawimawhzia inzirtir a ṭul," tiin, thla hnih chhung Mizoram hmun hrang hrangah Y-20 meet buatsaih a nih thu a sawi.

India ramin G-20 presidency a chelh kum puala hmalakna chi khat, Youth 20 Mizoram Meet on Nationalism, Patriotism & Development hi July 14, 2023 khan ṭan a ni a, Mizoram pumah intawhkhawmna eng emaw zat buatsaih a nih hnuin nimin khan khâr a ni.