Tar pension la mek 25,213 an awm; Home-ah naupang 763 enkawl mek a ni

Social Welfare and Tribal Affairs (SWTA) minister Lalrinawma chuan nimin khan Aizawl Press Club-ah thuthar thehdarhtute a kâwm a; SWTA department-in pianphunga rualbanlo kum 18 chung lam mi 742 hnenah leh hmeithai mi 2,310 hnenah ṭanpuina Rs 400 a pe mek a, kum 60 chung lam mi 25,213 hnenah ṭanpuina a pe mek tih a sawi. Naupang enkawlna home 49-ah naupang 763 enkawl mek a nih thu a sawi bawk.

Lalrinawma hian SWTA department hmalaknate a tarlang a; a sawi danin, Indira Gandhi National Disability Pension Scheme hnuaiah Mizorama rualbanlo mi 742 hnenah thla tin Rs 400 pek ṭhin a ni a; Rs 400-a Rs 300 chu sorkar laipui tum niin, Rs 100 chu Mizoram sorkar tum a ni.

Indira Gandhi National Widow Pension Scheme hnuaiah hmeithai kum 40-79 inkar tan thla tin Rs 400 pek ṭhin niin, sorkar laipuiin Rs 300 leh state sorkarin Rs 100 an tum a; Mizorama hmeithai 2,310 pek mek a ni. BPL chhungkuaa eizawngtu berin a thihsan chhungkua 197 hnenah kum tin Rs 20,000 an pe mek.

Tar pension tia sawi ṭhin, Indira Gandhi National Old Age Pension Scheme hnuaiah kum 60-79 inkar hnenah thla tin Rs 300 leh kum 80 chung lam hnenah Rs 600 pek ṭhin a ni a; kum 60-79 inkar mi 17,765 leh kum 80 chung lam mi 7,448 hnenah pek mek niin, tar pension pek mek zawng zawng chu mi 25,213 an ni. Tar pension chi hnihah hian state sorkarin Rs 100 ve ve a tum a, a bâk zawng sorkar laipuiin a tum.

Lalrinawma chuan, nu leh pa leh chhungte intibuai leh court-a inkhing naupangte enkawlna atan special home, observation home leh tawm himna hmun (place of safety) buatsaih a nih thu a sawi a, "Child Welfare Committee leh Juvenile Justice Board-in thutlukna an siam hnuah dah ṭhin a ni," a ti.

Minister sawi danin, Mizoramah home 49 a awm a, sorkar enkawl 18 leh pawl (NGO) enkawl 31 a ni a, chu'ngah chuan naupang 763 an awm mek. Home 49 zinga 32 chu children home niin, sorkar enkawl paruk leh NGO enkawl 26 a ni a; specialised adoption agency paruk awmin, sorkar enkawl pakhat leh NGO enkawl panga a ni. Sorkar enkawl home dang chi thum - observation home pariat, special home pahnih leh place of safety pakhat a awm bawk.

SWTA MINISTER TARLAN ṬHENKHAT

▶ SWTA department-in scheme 13 a kalpui mek a, scheme 13 zinga pathumah sub-scheme 11 a awm.

▶ Women & Child Development (WCD) directorate hnuaiah Saksham Anganwadi & Poshan 2.0 (ICDS), Mission Vatsalya leh Mission Shakti te kalpui a ni.

▶ WCD-in Ministry of Social Justice & Empowerment hnuaiah ruihhlo ngai enkawlna de-addiction centre pasarih an enkawl mek.

▶ Jordan Centre, Seṭhawnah enkawl lai mi 44 an awm a, thawktu mi 51 bakah, visiting doctor an awm.

▶ Lunglei, Serchhip, Ngopa, Lawngtlai leh Chawngte-ah Eklavya Model Residential School (EMRS) a awm a, thawktu 130 leh zirlai 1,210 an awm mek. Tlangnuam (Aizawl), Zawlnuam, Bilkhawthlir leh Niawhtlangahte EMRS sak mek a ni.

▶ PMAAGY hnuaia hamṭhatna dawng turin Mizorama khaw 344 thlan a ni a, zirna, hriselna leh inkalpawhna lama hmalakna atan khaw pakhat tan Rs 20,30,000 zel ruahman a ni.

▶ ICDS (Saksham Anganwadi & Poshan 2.0) hnuaiah Mizoramah anganwadi 2,244 a awm a, thawktu anganwadi worker 2,244 leh helper 2,244 an awm.

▶ Anganwadi centre 2,244 zinga 247 chu RCC building a ni a, a bak zawng (1,997) chu assam type leh di in a ni.

▶ October 2022 thlengin anganwadi-ah naupang (thla 6 - kum 6) inziak lut 1,29,466, nu nau pai leh nau pawm inziak lut 13,158 leh tleirawl (kum 14-18) inziak lut 36,885 an awm.