Huaisen chawimawina hlan a ni

Ministry of Home Affairs-in mi huaisen, mi dang nunna chhanna tura che chhuakte chawimawina a pek Jeevan Raksha Padak Award 2022 hnuaia chawimawina chi khat, Uttam Jeevan Raksha Padak dawng tura thlan Kolasib district-a mi pahnih hnenah nimin khan Kolasib DC John LT Sanga hoin DC conference hall-ah award hlan a ni.

Huaisenna chawimawina dawngtute chu - August 27, 2021-a VL Siama Parte, Kolasib Diakkawn fate pathumin an in hnuaia an tuizém tihfai an tumna lama an thih vek ṭuma chhanchhuah hna thawktu Lalchhuanliana (L) leh Lianzalama, Kolasib ve ve te an ni a; Lalchhuanliana award dawn chu a nupui hnenah hlan a ni.

Lalchhuanliana hian bazar a kal haw lamah vanduaina tâwk an awm tih hriain, vanduaina thlenna hmun a pan nghal a, tuizem chhungah a lut ve nghat a ni. Mi nunna chhan a tumna lamah hian vanduaina tâwk vein, damdawi-in panpui a nih hnuah a thi.

Lianzalama pawh hi tuizêmah lut vein, tuizem chhunga chesual mi pali zinga pahnih chu tuizem chhung aṭanga a lak chhuah hnuah thâwk a harsat tak avangin páwn lamah an pawt chhuak a, nikhaw hre loin a awm zui a, hun eng emaw chen hnuah a harh chhuak leh a ni.

Kolasib district mi pahnih hian Uttam Jeevan Raksha Padak an dawng a; chawimawina hian Rs 1,50,000, thuchei leh medal a keng a ni.