Sem policy kan duh lo mai ni loin kan do tlat - ZPM Working President

ZPM working president K Sapdanga chuan, tuna political party ṭhenkhatin an hlauh leh huphurh ber chu ZPM party-in sorkarna a chan a nih thu a sawi a; ZPM chuan sem policy an duh lo mai ni loin, an do tlat thu a sawi bawk.

K Sapdanga hian nimin khan Hrangturzo biala North Mualchéng, Bâwktlang, North Vanlaiphai, East Lungdar leh Biate khuaahte vantlang inkhawmah thu a sawi a; ZPM-in Mizoram hmun hrang hrangah hma a sawn zel tih sawiin, "Tunah hian party ṭhenkhat hian hlauh an nei a, huphurh an nei a, chu chu ZPM a sorkar hi a ni," a ti.

Inthlan reng rengah tu nge ram hruai dawn tih ngaihtuah a ṭul thu sawiin Sapdanga chuan, "Party chauh ni loin, an policy-te kan zir chiangin kan khaikhin ṭhin tur a ni. ZPM hian ṭhalaite kan focus nasa dawn a, taima leh thiamna neite an bánah kaiin kan khai chhuak dawn," a ti a; political party-te chu mimal leh páwl anga inbei vak vak lo a, policy hmangin inbei se ramin hma a sawn phah zawk tur thu a sawi.

ZPM Working President chuan, ZPM party chuan vote ringawt an buaipui lo tih sawiin, "Tute nge dâwm kân ngai, tute nge ṭanpui ngai tih hi kan thupui pakhat a ni. Chhungkaw tin hmasawntir kan duh a, sem policy hi kan duh lo mai ni loin kan do tlat a ni," a ti.

ZPM candidate turte chu eiru lo turin an intiam tih sawiin Sapdanga chuan, "Corruption hi awm lo se la, tun ai hian kan hrisel zawk kan ring a, kan kawngte hian hma a sawn kan ring a, kan zirnate hian hma a sawn zawk kan ring. Mizote hi hnam taima kan ni, thlai thar lei kan aupui ṭhin chhan chu kan thawhrimnate'n awmzia nei se, kut hnathawktute kut durh thlâwn lo se kan tih vang a ni," a ti a; thlai thar hralhna mumal taka a awm chuan ram sum leh pai leh khawsak phungin nasa taka hma a sawn dawn thu a sawi.

Hrangturzo biala ZPM candidate tur Lalmuanpuia Punte pawhin thu sawiin, "Kan policy hian mi zawng zawng a huam a, thlai thar kan lei pawhin mi zawng zawng ta kan lei mai dawn. Sawhthing kan lei pawhin ZPM ta chauh lei loin, party dang ta pawh kan lei dawn a ni. Sorkarna kan chang a nih chuan kum 5 chhungin electric bill kan tisang dawn lo," a ti.