Mizote chu pi leh pute hun lai aṭanga chhiah pe ṭhin kan ni - Taxation Minister

Taxation minister Lalchamliana chuan nimin khan Hnahthiala State Tax deputy commissioner pisa thar a hawng a; Mizote chu pi leh pu hun lai aṭang tawha chhiah pe ṭhin an nih thu a sawi.

Pisa hawnna inkhawm hi UDPA secretary H Lianzela'n a kaihruai a; Taxation Minister chuan, hun eng emaw ti lai aṭanga engkima sorkara innghah tumna rilru a piang ta chu pawi a tih thu sawiin, "Mizote hi pi pu hun lai aṭang tawha chhiah pe ṭhin kan ni. Chhungkua, khua leh ram zahawm ni tur chuan intodelh a, mahni kutkea din theih a pawimawh hle, chumi tur chuan nasa lehzuala ṭan lak a ngai," a ti.

Lalchamliana chuan, kum kal taa Taxation department-in sorkarin chhiah khawn tura a tuk zat an khûm chu lawmawm a tih thu a sawi rualin, "Sorkar budget nen khaikhin erawh chuan a beitham hle. Ram a intodelh loh chhung chuan a zahawm thei lo," a ti a; ngaituahna thar nen Taxation department thawhpui thiam turin mipui a chah.

Sorkarin sum hnar chi hnih - tax revenue leh non-tax revenue a neih thu sawiin Minister chuan, Taxation department-in tax revenue-ah mawhphurhna a lak thu a sawi a, "Non-tax revenue - tui bill, electric bill, stamp fee leh a dangte mipuiin tláwm zawka an hman theih nan sorkarin sum tam tak séngin subsidy-in mipui a pe ṭhin a, hei hi hriatpuiin, mipui pawhin chhiah pek lamah ṭan kan lak zual a ṭul hle a ni," a ti.

Taxation Minister chuan, sorkar laipuiin chhiah a lak luh zawng zawng aṭanga 0.50% chu Mizoramin a chang a, chu chu Mizoram sum hnár lian ber a nih thu te, Mizoramin sum a mamawh zawng zawng aṭanga 10% chauh a lak luh ve thute a sawi bawk.

Taxation department hi May 20, 1988 khan Excise department aṭangin a indang a, Commissioner of State Tax hnuaiah zone 14 a awm mek. Kum 2022-23 financial year chhung khan target cheng vbc. 900 a nih laiin, cheng vbc. 1,020.66 an hmu a; sorkar kum kal mek 2023-24 ah August 31, 2023 thlengin cheng vbc. 492.90 an hmu tawh a ni.