Politics khelh danah Kristianna a ṭha bik tih lantir a ngai - MPCC thupuangtu

Congress party chuan September 13, Nilaini khan Champhai Kanan Veng bazarah street campaign an buatsaih a; MPCC general secretary leh thupuangtu Dr Lallianchhunga, Champhai South biala Indian National Congress candidate turin thu sawiin, politics khelh danah Kristianna a ṭha bik tih lantir a ngaih thu a sawi.

Dr Lallianchhunga chuan, "Kan politics khelh danah Kristianna hi a ṭha bik a ni tih kan lantir a ngai a, hei hi hnam dang, ring lote zingah Pathian kan chawimawi theihna tur a ni. Mipui hnena beiseina belhchian dâwl lo sawi fo hi a Kristian lo a, mipui hnena kan intiamna hi rintlak rawh se," a ti.

Politician-te'n beidawngin mipui an siam tur a ni lo tih sawiin Lallianchhunga chuan, "An tana rintlakin kan nung tur a ni a, Isua zirtirna nena inmilin ram leh hnam hruai kan tum tur a ni,” a ti a; MPCC president Lalsawta vangin tun hma zawng aiin Mizoram nasa takin a danglam thei niin a sawi.