Arsi ên zual hun a ni - Zoramthanga

MNF president Zoramthanga chuan Melriat community hall-a Aizawl South-lll North Block MNF Conference a hmanpuinaah, arsi èn zual hun a ni mek niin a sawi a; ZPM mite'n 'Kohhran hi kan unit' an ti niin a sawi bawk.

Zoramthanga chuan, ram rorelnaah Pathianin rorelna chelh turin hun a ruatsak zel ṭhin tih sawiin, "A hun a tih tawh loh chuan engtiang pawhin intuaithar ṭhin mah ila, rorelna chelh theih a ni tawh ngai lo... Tun hun hi arsi hun a ni. Arsi hi MNF-in kan duha kan neih a ni lo. Kan duh ber chu sakei a ni a, mahse, chung lamin a ruahmanna chuan kan duh rêng vang ni loin, ECI lamin arsi min pe mai a, arsi ên zual hun a ni," a ti.

ZPM leh Lalduhoma chungchang sawiin Zoramthanga chuan, "Hming pawh vawi sawm chuang zet an inphuah kual a, vice president ṭáwl ngah ber an ni hial... Engkim chhe vek tih auhla nen, negative politics game an rawn aupui a, kan innghahna chu kohhran, kohhran hi kan unit an ti. Party ni loin movement kan ni an inti a, anmahni chiah ṭhaa inngaiin, Pu Hawla, Pu Ṭhena leh Pu Rama chu sual leh chhe tàwpah an puh," a ti a; mipuiin enchhin tlâkah an ngai lo niin a sawi.

MNF President chuan, Aizawl South-lll bial chu Sateek bial a nih lai aṭang tawhin MNF kulhpui a nih thu a sawi a, "MNF thuthlung lo pianna bial a ni a, bial pawimawh tak a ni. MNF MLA neih leh ngei a nih ka beisei," a ti.

Inkhawmah hian Aizawl South-lll bial chhung mi 651 MNF-ah lawm luh an nih thu MNF thuchhuah chuan a tarlang.