Thu dik lo hmanga BJP bei fo lo turin BJP-in Congress President an chah

BJP, Mizoram chuan, Mizoram Congress party president Lalsawta'n thu dik lo hmanga BJP a bei fo nia sawiin, pawi an tih thu an tarlang a, Kristian ze dik tak leh Mizo ze dik tak hmanga vote zawng tur leh thu dik lo hmanga BJP bei fo lo turin an chah.

BJP chuan thuchhuah siamin, MPCC president Lalsawta leh a thawhpuite chu Mizo mipui ngaihtuahna hruai sual thei zawnga dâwt thu thehdarhah an puh a, "Dâwt hmanga BJP bei tawh lo tur leh vote zawng lo turin kan ngen," an ti a, Congress hotupa Rahul Gandhi-a'n Paris-a zirlaite leh academician-te hmaa BJP leh Hinduism chungchang a sawi media hrang hranga lang chu zir chianga hre chiang turin an chah a ni.

Rahul Gandhi-a'n, 'BJP chêt dan leh Hindu sakhuain inlaichinna leh inzawmna an nei lo. Gita ka chhiar tawh a; Upanishad vawi tam ka lo chhiar tawh a; BJP-te thil tih danah hian Hinduism leh Hindu-na a awm lo tak zet a... BJP leh Hinduism hian inzawmna a nei lo,' tiin a sawi niin BJP chuan an tarlang.

BJP leh prime minister Modi-a a fak hreh a nih pawhin, Rahul Gandhi thusawi aṭang tala harh chhuak turin Mizoram BJP chuan Lalsawta an chah a, "Dâwt phuahchawp vanga Mizote'n kum kha leh chen kan lo tawrh tawhna kha a tâwk hle tawh a, Mizoram hmangaihna tak tak nen ram politics vei tawh turin kan chah a ni," an ti a, Congress party chu mipui bum duh tâwk tawh turin an ngen.

Mizoram BJP chuan, BJP thil tum chu - 'India ram khawvela ram changkang leh intodelh, khawvela thawh chhuah ngah ber, mi tinin an mamawh ang hmasawnna an dawn ṭheuh theihna atana thawh' a nih thu an tarlang a, "PM Modi-a hoa kum 9 sorkarna BJP-in a chan aṭanga a hnathawh ber leh an thil tum chu India chak taka siam leh ram hmasawn bera siam a ni a, BJP hnathawh ṭhat hi Mizoram pawhin a takin kan chang mek," an ti.