Lungsen Aspirational block-a hmalak chhoh dan tur sawiho

Lunglei District Consultative Committee on Aspirational Block chu September 13, Nilaini khan district bawrhsap Ramdinliani hoin DC conference hall-ah an ṭhukhawm a, sorkar laipuiin Lunglei district-a aspirational block-a a puan Lungsen RD Block-a hmalak dan tur an sawiho.

Ṭhutkhawmah hian Lungsen BDO pisain an buatsaih, Draft Block Development Strategy for Lungsen RD Block, Lunglei district chungchang zirho a ni a; Steering Committee for Aspirational Block din nghal a ni.

Bawrhsap Ramdinliani chuan, sorkar laipui hmalakna reng rengah data a pawimawh thu a sawi a, "Bul kan ṭan aṭangin kan statistics-te a dik hle tur a ni. Hmuh hmaih a awm em, siamṭhat ngai a awm em, tihte fimkhur taka en reng tur a ni," a ti.

Sorkar laipui chuan Aizawl district-a Reiek RD Block, Saitual district-a Ngopa RD Block leh Lunglei district-a Lungsen RD Block-te chu aspirational block-ah a puang a ni.