KHAWTHLIR

Zirtirtu chawimawi

Kolasib District Education Committee chuan September 13, Nilaini khan Kolasib Diakkawn High School hall-ah National Award to Teachers 2023 dawngtu Lalthianghlima, Diakkawn H/S zirtirtu chawimawina hun an hmang a, Kolasib District Education Committee chairman leh bawrhsap John LT Sanga'n lawmpuina a hlan. National Award to Teachers 2023 hian Rs 50,000, thuchei leh silver medal a keng a ni.

Ralna & thlahualna

MZP Gen.Hqrs chuan Manipur tualchhung buai vanga vanduaina tâwk Mizo hmeichhiate thlahualna leh ràlna atan September 13, Nilaini khan Hmar Students' Association Joint Hqrs, Tuiṭhaphai, Manipur hnenah Rs 1,25,000 an hlân. Pawisa an hlan hi Chin Baptist Church, USA Women department-in an thawh Rs 1,00,000 leh MZP-in an thawh Rs 25,000 a ni a; an zahawmna tihbawrhbànsak hmeichhia pathum hnena Rs 10,000 ṭheuh leh ram tana nunna hlantu hmeichhe 18 chhungte hnena Rs 5,000 ṭheuh pek tur a ni.

Hranghluite kâwm

Art & Culture department leh Mizo Academy of Letters Joint Headquarters, Lunglei chuan nimin khan Lungleia Art & Culture Auditorium-ah hranghluite kawmna, Meet the Elders/Authors an buatsaih. He hunah hian LT Muana, Serkawn, Dr Ramdinthara Sailo, Chanmari, PC Lalduhthlanga, Venglai leh K Krawsthanga te kawm an ni.

SEDP tlangzarh

Nimin khan Central YLA Hall, Lawngtlai-III ah Family Oriented SEDP Phase-II tlangzarh inkhawm buatsaih a, Lawngtlai East bialtu MLA H Biakzauva, dy. speaker-in a hmanpui. H Biakzauva chuan SEDP phase-I hlawhtling tak a kalpui a nih hnuah September ni 15 ral hmain chhungkaw 4515-in phase-II hnuai a tanpuina an dawng leh tur chu lawmawm a tih thu a sawiin, "Phase-III kalpui turin inbuatsaihna a kal mek a ni," a ti.