KHAWTHLIR

Chief minister Zoramthanga chuan nimin khan National Highway (NH) 54, Khamrang-Buichali inkar kawngpuia PWD chan a enfiah a, "Fûrpui kan hmachhawn turah NH-54 kawngpui hi a pin mai loh nan theih ang anga hmalak a, a chhe zual laite thawm ṭhat a ngai. A ṭul a nih chuan state sorkar sum pawh a remchan dan ang zela hman ni se," a ti a; state economy inkhai chhuahna tura mamawh tam tak zingah inkal­pawhna ṭha neih a pawimawh tih sawiin, thawktute chu ṭha­hnemngai taka hma la turin a chah.

Mizoram páwn aṭanga rawn lut, Aizawl khawpuia quarantine facitity hrang hranga ni 14 chhung khung hrante chu Indian Medical Association (IMA), Mizoram Government Doctors’ Association (MGDA) leh private hospital fawng vuantute zing aṭanga din Medical Operation Team-te'n an vilpui dawn a; quarantine facility chan insemin khung hrante hriselna an enfiah ṭhin ang. Aizawl khawpui páwn lama khung hrante chu district-a chief medical officer-te'n an vil zui zel dawn a ni.

Aizawl Civil Hospital (ACH) out patient department (OPD)-ah mipui inentir an tam ṭhin a, social distancing a taka kalpui a harsat avangin Medicine OPD chu May 20, Nilaini aṭang khan Dawrpui Multipurpose Centre-ah sawn a ni. ACH Medical Superintendent chuan man chawi loa hall hmantir an nih avangin Dawrpui khawtlang hruaitute chungah an lawm thu a sawi.

Kolasib District Border Safety Monitoring Team-te chuan nimin khan Covid-19 doa ramri vengtu South Chhim­luang leh North Thing­lian task force-te hnenah buhfai ip 15, dailuah leh alu ip 8 an hlân. Team hian ramria task force duty-te an tlawh kual ṭhin a, an mamawh hrang hrangte an ngaihtuahsak ṭhin a ni.