Bangladesh bazar-a kangmei chhuakah dawr 100 chuang kang

Bangladesh khawpui, Dhaka-a bazar hmunpuiah nimin zing khan kangmei nasa a chhuak a, dawr za tel a kang.

Kangmei chhuahna hmun hi Mohammadpur Kirishi Marke a ni a, zing kar, dawrte pawh an la inhawn hmaa thleng a ni. Bazar hi eirawngbawlna tel leh plastice zawrhna dawrte a tam avangin kangmei pawh hian a kangkai chak hle. Kangṭhelhtute chuan darkar ruk chuang hnuah an ṭhelh mit thei a, kangmei ṭhelhnaah hian sipaite'n an pui bawk.

Fire service official Shahjahan Sikder chuan electric short circuit vanga kangmei hi chhuak nia a lan thu a sawi a, vanneihthlak takin mihring hliam leh thi an awm lo.

Dhaka khawpuiah hian in leh dawr saknaah a himna lam, safety measure ngaih pawimawh a nih tawk ṭhin loh avangin kangmei a chhuak fo a ni. Khawpui chhunga kangmei chhuahna tam tak hi gas cylinder phui tawk loh vang te, air conditioner leh electirical wiring ṭhat tawk loh vangte a ni ṭhin.

Kumin April thla pawh khan Dhaka-a shopping complex-ah kangmei nasa tak lo chhuak tawhin, dawr 5,000 vel zet a chhia. Kangmei chhuak an ṭhelhna lamah kangṭhelhtu pawl zinga mi eng emaw zatin hliam an tawrh phah bawk a ni.