CM Hawla leh HM Zira ten Mipuite kum thar chibai an bûk

Chief minister Lal Thanhawla chuan, Mizo mipuite chu kumthar 2016 chibai a bûk a, tisa leh thlarau lama Pathianin mal a sawm kum a nih ngei theihna atan duhsakna a hlan. Home minister R Lalzirliana pawhin Mizoram mipuite hnenah kum thar 2016 chibai bûkin duhsakna a hlan bawk.

CM Lal Thanhawla chuan, kum 2015 chhunga Pathian hruaina duhawm tak dawng a, kum 2016 kan chuangkai chu lawmawm a tih thu sawiin, "He kum thar lawmwam takah hian Zoram mipuite chibai ka bûk che u in, duhsakna ka hlan a che u. Enoka chu ni tin Pathian nen an léng dun ṭhin a, tih ang khan Pathian páwlin, lên dunpui tum ila, Zoram thar, Zoram nuam, Pathiam chawimawi ram kan siam thei ngei ang," a ti.

Chief Minister chuan, kum tharin eng nge a rawn thlen dawn hre lo mah ila, hun siamtu leh neitu chu Pathian nung, pathiante Pathian a nih avangin amaha innghat pumhlûm turin Mizo mipuite a sáwm.

Kum hluia tlin lohna leh fel lohnaah Pathian hnena ngaihdam dil a ṭul thu sawiin CM Hawla chuan, "Kan dik loh leh fel lohnate sim tum ila, kan nun hi siam thar zel thei Pathian hnenah i hlan ang u. Lawmthu hril nun neih i tum
ṭheuh ang u," a ti.

Lal Thanhawla chuan, ringtute tan Pathianin a hûnna ṭheuh chu an rawngbawlna a ni tih hriat a pawimawh thu sawiin, "Kum tharah hian kan hna ṭheuh rilru leh tih tak zetin rinawmna, dikna, taimakna leh Pathian nung nen i thawk ang u," a ti a; Mizo mipuite chu hnam nun leh kohhran nun hmanga Pathian chawimawi tum ṭheuh turin a sáwm a ni.

Home minister R Lalzirliana pawhin kum tharah rilru thar pú a,ṭhahnemngai taka mahni hma zâwn ṭheuha ram leh hnam tana inpe thar turin Mizo mipuite a sáwm.

Vanglaini palaiin a kawmnaah R Lalzirliana chuan, ei raltu ri-ngawt ni lo turin mipuite a sáwm a, "Kum tharah hian thawh chhuah nei loa a ei raltu mai mai nih a hrehawm tih nachang leh zah nachang hre thar ila. Kan thawh chhuah mila khawsak ṭheuh i tum ang u. Awhna hian sualah min hruai lut thei a ni," a ti.

R Lalzirliana chuan, sakhaw rawngbawltute leh ram hruaitute chu an enkawl mipuite hnenah damna leh inlungrualna tak tak an thlen em tih mahni inzawt nawn fo turin a sáwm a; mahni tih tur ṭheuh ti tura mipuite chahin, "Mi tin mahni tih tur ni lem lo khawih ve ṭhin kan awm avangin sorkar tan pawh ṭul loah hna tam tak kan siam ṭhin tih hria ang u. Mahni nihna hre chiangte hi mi zahawm an ni ṭhin," a ti.

Krismas leh kum thar vuakvêtah kum dang aiin chhiatna thleng a tlem nia sawiin R Lalzirliana chuan, "Police-te'n theihtawp an chhuah bakah, NGO-te pawhin boruak muanawm a awm theihna atan thâ an thawh nasa," a ti. Mipuite'n hlim leh thlamuang taka hunpui an hman theihna atana tha thawhtu zawng zawngte hnenah lawmthu a sawi a ni.