ASI-in pipute sûlhnu zir chiang tan dawn

Archaeological Survey of India (ASI) mithiamte chuan, naktuk aṭang hian Vangchhia khuaa pipute sûlhnu hragng hrangte an zir chiang ṭan dawn a; hei hi Mizorama ASI-in excavation work an tih hmasak ber tur a ni.

INTACH Mizoram Chapter convenor P Rohmingthanga hnen aṭanga thu dawn danin, ASI director general Dr Rakesh Tiwari thupek angin, ASI mi pasarihte chuan Mizoram khawchhak lama Vangchhia-ah pipute sûlhnu hrang hrangte chu January 5 aṭang hian chipchiar zawkin an zir chiang dawn a; hetiang tur hian ASI DG leh INTACH Mizoram hotute chu tun hnai khan Vangchhia leh khawchhak tlangdungah zinin, excavation work ti turin ruahmanna an siam a ni.

ASI mi leh sate hian nimin khan Aizawl an lo thleng a, nak-tukah Kawtchhuah Ropui leh chhehvelah hna an ṭan beisei a ni. A hmunah an inkulh ang a, an chàm hun chhung tur hriat a ni lo.

Vangchhia khaw dáia Kawt-chhuah Ropuia lungphun lian tak tak leh milem chuangte chu a khaw mite’n kum 1990 vel aṭangin an lo humhalh tawh a, INTACH Mizoram Chapter hmalaknain February 17, 2014 khan ASI enkawltu, Ministry of Art and Culture chuan 'Archaeological Site of National Importance' ah a lo puang a ni.

P Rohmingthanga chuan, ASI excavation work hian Mizo history leh culture tan rah ṭha a neih ngei an beisei thu a sawi.