Hmeichhe pahnih pawngsuala puhte man

December 26, 2015 khan Lawngtlai district-a Rulkual khaw mi pahnihin R.Vanhne khaw nu pakhat, pasal pawm lai nei leh Upper Saikaha hmeichhe pakhat an pawngsuala hriat a ni a; thil thleng duh loh lantir nan December 30 khan R.Vanhne khaw mipuite'n Lawngtlaiah kawng an zawh.

Thu dawn danin, hmeichhia pawngsualtua puhte hi Lalruatsanga (22) leh a ṭhianpa kumtlinglo, Rulkual khaw mi ve ve an ni. An pahnih hian police-te'n an man hnuah, Lalruatsanga chu Lawngtlai District Jail-ah dah luh a ni a, kumtlinglo zawk erawh chu bail-in chhuah lailawk a ni.

Pawngsualtua puh pakhat zawk chhuah a ni chu R.Vanhne mipuite'n hrethiam loin, Decem-ber 30 khan Lawngtlaiah kawng-zawhin, Lawngtlai Bazar aṭangin Lawngtlai Police Station an pan. Lawngtlai PS péngah police-te'n lo dawngsawngin thil awmdan an hrilhfiah a, pawngsualtua puh kumtlinglo chu an man leh tawh a, magistrate thupek angin Lungleia Observation Home-ah dah a nih thu an hrilh a; mipuite pawh an ṭîn a ni. Kawng zawhtute hi Lai Women Association gen.hqrs leh MHIP hruaitute'n an ṭawiawm.