Kum hlui thlah zanah thana-ah mi 123 táng

Kum hlui 2015 thlah leh kum thar 2016 lawm zan khan Mizorama police station hrang hrangah mi 123 an táng a, a tam ber chu zu ruih vanga man an ni.

Police aṭanga thu dawn danin, December 31 zana police-in an man, thana-a tángte zinga mi 101 chu zu ruih vanga man an ni a, police man mi 100 leh Excise & Narcotics lamin an man mi pakhat an ni. Zu ruih vanga mante chu a tuk zingah kum thar lawm nan chhuah an ni. He mi zana tángte zingah hmeichhia pali an tel.

December 31 zana táng awm lohna PS pahnih a awm a, chungte chu Mamit PS leh Vairengte PS an ni. Táng zingah MLPC Act bawh-chhia an tam a, IPC bawh-chhiatna lian tham a awm lo.

Kum hlui thlah zanah hian Lunglei PS-ah zu ruih vanga man mi 20 an awm a; Vaivakawn PS-ah táng 17 awmin, zu ruih vanga man 11, hâlpuah vanga man panga leh motor rûk vanga man pakhat an ni. Lawngtlai PS-ah zu ruih vanga man mi 14 an awm.

Kolasib PS-ah táng 10 awmin, rûi chunga intihbuai vanga man paruk, rûkrûk vanga man pahnih leh family case-a man pahnih an ni a; Serchhip PS-ah zu ruih vanga man mi pakua awmin, Saiha PS-ah zu ruih vanga man pasarih leh rûkrûk vanga man pakhat an awm a ni.

Aizawl PS-ah táng paruk awmin, rûkrûk vang leh ruih vanga mante an ni a; Zonuam Outpost-ah zu rui pali an táng a, Kulikawn PS-ah mi thil rua rinhlelh mi pahnih an kawl a, Champhai PS-ah mi bum vanga man hmeichhia pakhat an kawl bawk.

Aizawla Excise & Nar-cotics-te pawhin De-cember 31 zan hian táng mipa pa-thum an nei a, zu mansak pahnih leh zu rui pakhat an ni.

Hetih lai hian, Krismas urlâwk zanah Mizoramah PS hrang hrangah mi 98 an táng a, chung zinga mi 72 chu zu ruih vanga man an ni. Urlâwk zana táng ngah ber Bawngkawn PS-ah 32 tangin, hmeichhia pakhat a tel a, mi 32 zinga 28 chu zu rûi leh rûi chunga lirthei khalh vanga man an ni.