KHAWTHLIR

Thisen pe

Kohhran Thianghlim chuan December 28-29, 2015 khan Solomona Temple-ah thisen pek rûnpui an huaihawt a, Aizawl Civil Hospital tan unit 590 an pe. December 28-ah mipa 200 leh hmeichhia 54-in unit 254 an pe a, December 29-ah mipa 198 leh hmeichhia 138-te'n unit 336 an pe leh a ni.

Hun pawtsei

Aizawl DC chuan Bawngkawn Brigade area-a Baptist biak-in sak lai bula mipui punkhawm khapna thupek, prohibitory order a tihchhuah chu CrPC Section 144 tlawhchhanin, Governor-in thla ruk chhung atan December 29, 2015 khan a pawtsei.

CM-in TNT tanpui

Chief minister Lal Thanhawla-te nupa chuan December 31 zan khan TNT Family Nite an hmanpui. CM Hawla chuan, TNT rawngbawlna chu Pathian duh zawng a ni tih sawiin, "Ṭangkai zawk leh ṭha zawka an thawh zel theih nan ṭawngṭaipui an mamawh tih kan hriat a ngai," a ti. Chief Minister hian TNT ṭanpui nan Sangthankima hnenah Rs. 1,50,000 a pe nghal a ni. TNT Zuangtuiah hian fahrah, ruihhlo ngai, mi ang lote bakah thawktu zawng zawng nen mi 1,375 an awm mek.

Luiah tla hlum

December 25, 2015 zing dar 4 vel khan H Zosangliana (32) s/o Kiaunawna Hnialum, Thaltlang chu Chhimtuipuia Thanngerh kaiah a tla hlum. Thu dawn danin, Zosangliana hi a ṭhiante nen ramah an riak a, Krismas hmang tura khuaa an haw tur chu Chhimtuipui lui an kân laiin tuiin a la a ni. A ruang hi December 26 chawhma dar 11 velah hmuh a ni.

High mast hawng

Rajya Sabha MP Ronald Sapa Tlau-in model village-a a thlan, Chhiah-tlang khuaa high mast thar chu December 28, 2015 khan Ronald Sapa Tlau-in a hawng. High mast bun nan hian cheng nuai 15 hman a ni.

Thiin chhar

December 27, 2015 zing dar 7 vel khan Ṭhuampui helipad chhuah lam, Thuampui Primary School kawtah Lalhminghlua (40), Zemabawk Lungbial chu thia chhar a ni. Thu dawn danin, Lalhminghlua taksa páwn lamah hliam hnûhmá a awm lo a, Aizawl Civil Hospital-ah a ruang endik a ni.

Jerusalem Khawmpui

Kohhran Thianghlim chuan December 25-27, 2015 khan Solomon Temple, Chawlhhmunah Jerusalem Khawmpui an hmang a, Aizawl leh Mizoram hmun dang
aṭangin palai ṭhahnem tak an tel.

SRS heroin man

Central YMA hnuaia SRS duty-te chuan, December 25-27, 2015 inkar khan heroin cane 35 leh chhìn sen thum an man a, Aizawl rate-a chhûtin Rs. 97,500 hû a ni. Krismas vuakvetah hian mi 27 an khâwm bawk. SRS duty-te hi Krismas-ah khan Mission Veng Kohhran leh Tuikhuahtlang Kohhran ten ruai chaw an pe a, SRS duty-te chuan lawm-thu an sawi.

Dawr kâng

December 28, 2015 zing khawvar hma, dar 3 vel khan Bawngkawn kawngpui aṭanga bazar pan thlakna kawng sirah B Nungi dawr a kâng a, bungrua chuh hman a ni lo. Thu dawn dan-in, dawr hi puan ṭhui-na dawr leh puanthân zawrh-na dawr a ni.

Bike chesualah thi

Lalramhlunsanga (33) s/o N Laicho, Phaihrang, Saiha district chu December 31, 2015 zan dar 6:00 - 6:30 inkar khan an khaw dáiah bike-in a chesual a, a hmunah a thi. Thu dawn danin, Lalramhlunsanga hi Theiva khua aṭangin a haw a, Saiha aṭangin a nau taxi nen inzuiin a hnung zawkah a tlan a, a chesual ta a nia hriat a ni. A chetsual lai hi hria an awm lo.