Scholarship tur la pe chhuak lo Pek chhuah hun tur a hriat loh

Kum 2015-2016 atana zirlaite scholarship tur sorkar laipui aṭangin Mizoram sorkarin sum a la dawng lo a, a dawn hun tur hriat a ni lo.

Vanglaini palai zawhna chhangin Higher & Technical Education minister R Romawia chuan, scholarship atana pawisa an la dawn loh thu a sawi a, "State dang pawhin scholarship tur sum an la dawng lo. Dawn a nih hun tur pawh hriat theih a ni lo a, sorkar kum chhung ngeia dawn hman beisei a ni," a ti a; sorkar laipui aṭanga sum dawn a nih veleh a rang thei ang berin zirlaite hnenah pek a nih tur thu a sawi.

R Romawia chuan, sorkar laipuiin sum a pek chhuah chuan state matching share turah chuan harsatna a awm a rin loh thu a sawi a, "A do lêtna tur chu kan hmu thuaiin ka ring," a ti.

HTE Minister sawi danin, zirlaite scholarship tur hi Ministry of Tribal Affairs leh Ministry of Minorities aṭanga hmuh tur a ni. Kumin hian online veka thil kalpui tum a ni a, mahse hei hi inpeihfel a buaithlak avangin scholarship tur chu state dangah pawh pek chhuah theih a la ni bik lo.

Thu dawn danin, kum 2015-16 atan sorkar laipuiin scholarship atan cheng vbc. 55 vel rawn pek an tum a, sorkar laipuiin sum hman dan tur chiang takin Mizoram Scholarship Board hotute an la hrilhfiah thei lo a ni.