Engineer-te'n inkhawmpui an hmang: Pathian ram ṭha tak min pe - CM

Mizoram Engineering Service Association (MESA) chuan nimin khan Berawtlang Multipurpose Hall-ah Annual General Conference vawi 42-na an hmang a, chief minister Zoramthanga'n hmanpuiin, Pathianin Mizote ram ṭha tak a pek thu a sawi.

CM Zoramthanga chuan tun hnaia Mizoramin harsatna a tawhte'n mahni kea din a pawimawhzia a zirtir tih sawiin, "Pathianin ram ṭha tak min pe a, kan leilung, boruak leh tuihna te, lei hnuai hausakna chenin mal min sawm nasa hle. He ram ṭhatna hai chhuak a, hmang ṭangkai a, mahni intodelh rama chantir turin engineer-te'n tam takin mawh kan phur a ni," a ti.

Vawi leh khatah sang tak thlen theih ni lo mah se, hmathlir fel tak nei chunga hmalak a pawimawh tih sawiin Zoramthanga chuan, "Kan hmabak awm mek hi kan engineer-te'n keimahni zâwnah chonaah ngai ila, mi dangte pawhin mahni hmazawnah ṭheuh i bei sauh sauh ang u," a ti a; Mizoram tung ding turin mi tinin mawhphurhna an neih thu a sawi.

Chief Minister chuan, engineer-te chu ramin hma a sawnna tura sûlsutute leh a taka thawktute an nih thu sawiin, "Hmun pawimawh tak luahtu leh mawhphurhna pawimawh tak chelhtute an ni. Hna lak belh in mamawhna in tarlante kan hriatpui che u a, service dangten an mamawhnate pawh kan hriatpui a ni," a ti.

Mizoram sorkarin sum leh paiah harsatna nasa tak a tâwk tih sawiin CM Zorama chuan, "Covid-19 avang khan tun kum thum chhung hian central sorkarin min pek theih tura an ngaih, budget-a dah tura min tih vek tawh, min pek theih leh tâk loh vbc. 3,500 vel a ni," a ti a, sorkar hna lakah leh kawng dangah an duh leh tum anga an kal theih loh thu a sawi.

MESA inkhawmpui hi an vice president H Zoramliana'n kaihruaiin, president Lalropuia pawhin thu a sawi. An member pension mi 12 thlahna hun an hman bakah, tun hnaia an member boral mi pasarihte sûnna hun an hmang.

MESA hi kum 1972 khan member pariat chauh neiin an ding ṭan a, tunah hian active member PWD-ah 144, Power & Electricity department-ah 73, PHED-ah 67 leh IWRD-ah 16 an awm a, an vaiin mi 332 an ni.